Álemdegi jyldyq tabysy eń joǵary fýtbolshynyń esimi jarııalandy
ASTANA. QazAqparat - Amerıkanyń «Forbes» jýrnaly óziniń jyl saıynǵy jer betindegi tabysy eń joǵary fýtbolshylar reıtıngisin jarııalady.
Onda alǵashqy oryndy «Real» (Madrıd) ıspandyq klýbynyń aıaqdop sheberi portýgaldyq Krıshtıaný Ronaldý ıelendi, dep habarlaıdy ITAR-TASS. Basylymnyń jazýynsha, 2013 jyly Ronaldý $73 mln. kóleminde tabys tapqan. Onyń $49 mln. - fýtbolshynyń jalaqysy men klýbtaǵy bonýsy bolsa, qalǵan 24 mln. dollar tabysy «Nike», «Samsung», «Tag Heuer», «Fly Emitates» jáne «Herbalife» syndy kompanııalarmen seriktestiginiń arqasynda túsken. Portýgaldyq shabýylshy bir matchta bir doptan artyq soǵyp (244 oıynda 251 gol), fýtbol alańynda basqa oıynshylardan góri kóbirek tabys tabady eken. Ótken jyldyń qyrkúıek aıynda ol bes jyldyq kelisimshartqa qol qoıǵan, sonyń nátıjesinde endi rekordtyq somany - 206 mln. dollardy ıelenýi tıis. Osy jyldyń qańtar aıynda ol álemniń eń úzdik fýtbolshysyna beriletin «Altyn dopty» ıelendi. Reıtıngtiń ekinshi ornynda ıspandyq «Barselonanyń» shabýylshysy argentıkalyq Lıonel Messı tur, onyń tabysy - $65 mln. Úshinshi oryndy frantsýzdyq «Parı Sen-Jermen» shabýylshysy Zlatan Ibragımovıch ıelendi. Onyń qanjyǵasynda alańdaǵy oıyny úshin tapqan $30 mln. tabysy men «Nike» jáne «Volvo» kompanııalarymen áriptestiginiń nátıjesinde tapqan $4 mln. bar. Sondaı-aq bul tizimdegi jyldyq tabysy eń joǵary aıaqdopshylardyń alǵashqy bestigine «Barselona» oıynshysy Neımar ($28 mln.), «Monako» jáne Kolýmbııa quramasynyń oıynshysy Radamel Falkao ($26 mln.) endi. Esterińizge sala keteıik, ótken jylǵy reıtıngte birinshi oryndy aǵylshyn Devıd Bekhem ıelense, Ronaldo ekinshi orynnan, al Messı úshinshi orynnan kóringen bolatyn.
