Álemdegi tuńǵysh bıonıkalyq adam jaryqqa shyqty
ASTANA. 15 qazan. QazAqparat - Bolashaqta medıtsına jaraqattanǵan organdardyń ornyna jasandy organ salý arqyly kez kelgen naýqasty ajaldan aman alyp qala alady dep boljanýda.
Shadow Robot Co kompanııasy álemdegi tuńǵysh bıonıkalyq adamdy qurastyryp, bul boljamdy rastaı túskendeı.
«Álemniń túkpir-túkpirinen 17 óndirýshi bizdiń robototehnıka komandamyzǵa tabıǵı dene múshesine óte jaqyn jasandy dene múshelerin, organdaryn usyndy», - deıdi atalǵan kompanııanyń basqarý dırektory Rıchard Ýolker. Revolıýtsııalyq jobanyń jetekshisi de osy kisi.
Vestı. Rý aqparattyq portalynyń habarlaýynsha, jańa robot adam aǵzasynyń qyzmetin60-tan 70 paıyzyna deıin atqarady. Boıy 185 santımetr bolatyn ol otyra alady, tura alady jáne júre alady.
Bıonıkalyq adamnyń tipti elektrondy sorap arqyly jasandy qandy aıdap, otteginiń tasymaldanýyn qamtamasyz etetin jasandy júregi de bar.
Árıne, robot «aǵzasynyń» kóptegen júıelerin naǵyz bıologııalyq jasýshalarǵa sáıkestendirý áli qıyndaý. Aıtalyq, onyń búıregi áli tek búırektiń prototıpi ǵana. Kóptegen músheleri tipti joq ta. Mysaly, bıonıkalyq adamnyń as qorytý júıesi, baýyry, terisi jáne mıy joq.
Mundaı bıonıkalyq adamnyń quny - 1 mıllıon $. Jańa robot Nıý-Iorktegi ataqty Comic Con festıvalinde bıylǵy jyldyń 11 qazanynda tanystyryldy.
