Álemdegi tanymal ǵalymdar Astanada Elbasy maqalasyn talqylaıdy
ASTANA. QazAqparat - AQSh, Eýropa men Azııa elderiniń tanymal ǵalymdary Halyqaralyq Túrki akademııasy (TWESCO) uıymdastyryp jatqan «Uly dala» ІІ Halyqaralyq gýmanıtarlyq ǵalymdar forýmy barysynda Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyn talqylaıtyn bolady. Bul týraly TWESCO baspasóz qyzmeti habarlady.
26 mamyr kúni Astanada ótetin Halyqaralyq forým Elbasynyń baǵdarlamalyq maqalasyndaǵy negizgi tezıster men mindetterdi talqylaýǵa arnalǵan.
Ekinshi ret ótkizilgeli jatqan forýmnyń jumysyna halyqaralyq uıymdardyń basshylary men ókilderi, memleket jáne qoǵam qaıratkerleri, dıplomattar, sondaı-aq sarapshy-ǵalymdar qatysady dep kútilýde.
Atap óteıik, ǵylymı is-shara aıasynda rýhanı jańǵyrý joldary, ǵylymı ıntegratsııa men jalpy qundylyqtar, álemdik órkenıettegi túrki mádenı murasy, túrki tilderi men ádebıetin zertteý men dáripteý, sondaı-aq tarıhı estelikter taqyryptary boıynsha 6 sektsııa ótkiziledi.
