Álemdegi tanymal fýtbolshylardyń biri dúnıe saldy
ASTANA. QazAqparat - Búgin Italııanyń «Fıorentına» komandasynyń qorǵaýshysy Davıde Astorı kóz jumdy, dep habarlaıdy «QazAqparat» HAA tilshisi klýbtyń resmı saıtyna silteme jasap.
31 jastaǵy Davıde Astorı komandasymen birge Ýdıneze qalasyna kelgen. Búgin Italııa chempıonatynyń 27-týry aıasynda Ýdıneze-Fıorentına matchy ótýi kerek bolatyn. Alaıda, «Fıorentına» komandasynyń kapıtany Davıde Astorı belgisiz jaǵdaıda qaıtys bolyp, kezdesý keıinge shegerildi.
«Fıorentına qaıǵy jutty. Klýbtyń kapıtany Davıde Astorı aıaq astynan kóz jumdy», - dep jazdy klýbtyń resmı saıty.
Davıde Astorı 1987 jyly ómirge kelgen. Ol fýtbol mansabyn «Portızola» akademııasynda bastady. 2001 jyly «Mılannyń» jastar quramasyna alyndy. 2011 jyldyń 29 naýryz aıynan bastap Italııa quramasynda oınaǵan. Alǵashqy matchty Ýkraınaǵa qarsy ótkizdi.
Foto: Claudio Villa/Getty Images
