Álemdegi sýburqaqtar astanasy Petergoftyń jazǵy maýsymy ashylady
ASTANA. 29 sáýir. QazAqparat - Búgin álemniń sýburqaqtar astanasy Petergofta sýburqaqtar atqan sýdyń aǵynymen jazǵy maýsym ashylady,
dep habarlaıdy ITAR-TASS. Dástúr boıynsha on metrge deıin sý shashatyn sýburqaqtardyń aǵyny Reıngold Glıerdiń «Ataqty qalanyń án-uranymen» bastalady. Eldiń shet aımaqtaǵy soltústik shaharynda teatrlandyrylǵan qoıylym ótedi.
Bıyl "Rýsskıı Versal" sýburqaqtary óz jumysyn ádettegiden erte bastaıdy. Jazǵy maýsymǵa oraı 2010 jyly qaıta jóndelý jumystary bastalǵan Úlken sarqyramanyń músindik jabdyǵy qaıta qalpyna keltirildi. Sondaı-aq altyn jalatylǵan 37 músin turǵyndar men qonaqtardyń kózaıymyna usynylmaq.
Petergof XVIII ǵasyrdyń basynda Fın shyǵanaǵynda Reseıdiń kúshimen boı kótergen bolatyn. Baǵzy zamanda sol kezdegi patsha bul qalany eń ádemi jazdyq patsha rezıdentsııasy retinde salyp, abattandyrǵan. Bir jaǵynan ol Eýropanyń eń ádemi jáne eń ataqty korolddik rezıdentsııalarmen salystyrylsa, ekinshi jaǵynan Baltyq teńizi úshin kúresken Reseı ımperııasynyń jeńisin pash etetin eskertkish ispettes. Aıta keteıik, «Eýropaǵa qaqpa» ıdeıasy sátti iske asyryldy. 1725 jyly 15 gektar alqapta Joǵary baqsha jáne 102,5 gektarlyq Tómengi baqsha qurylyp, álemdegi eń iri sýburqaqtar júıesi men músindik jabdyqpen sý sarqyramasy jasaldy.
