Álemdegi koronavırýs: Úndistandaǵy jaǵdaı, AQSh-ta vaktsına alǵandar maska taqpaıdy, Pfizer kovıdten dári jasamaq

NUR-SULTAN. QazAqparat – Úndistandaǵy jaǵdaı nasharlaýda, krematorıı retinde qalalyq turaqtar bólinýde, AQSh-ta tolyǵymen vaktsına alǵandar úshin maska taqpaýǵa ruqsat etildi. Pfizer vaktsına óndirýshisi jyldyń sońyna deıin kovıdten dári jasaýǵa ýáde berdi. Keıbir eýropalyq elder jazǵy mezgildi qutqaryp qalý úshin sheteldikterge erejelerdi jeńildetti, dep habarlaıdy QazAqparat BBC-ge silteme jasap.

Djons Hopkıns Ýnıversıtetiniń derekterine sáıkes, koronavırýs juqtyrǵandar sany 149 mln-ǵa jaqyndap, 3 mln adam qaıtys bolǵan.

Álemniń nazary Úndistanda. Onda Covid-19-dan qaıtys bolǵandar sany 200 myńnan asyp otyr. Sońǵy táýlikte elde taǵy 3 293 adam qaıtys bolyp, 360 myń jańa juqtyrý oqıǵasy tirkelgen.

Úndistanda álemdegi halyqty vaktsınalaý boıynsha eń úlken masshtabty kampanııa ashylǵan. El bıligi shildege deıin 250 mln adamdy vaktsınalaýdy kózdep otyr. Ázirge vaktsınanyń eki dozasyn halyqtyń tek 1,6%-y alǵan. Eń iri dári-dármek óndirýshisi ekenine qaramastan, Úndistan dári-dármek jetispeýshiligi týraly habarlaıdy.

AQSh maska taǵýdy mindetteıtin erejeni alyp tastamaq

AQSh vaktsına alǵandar úshin kóshede maska taǵýdy mindetteıtin erejeni alyp tastamaq. Prezıdent Djo Baıdennyń aıtýynsha, bul – eldiń vırýspen kúres kezinde jetistikke jetkenininiń belgisi.

Eýropalyq Odaq: jasyl pasporttar men vaktsınalyq dıplomatııa

Búgin Eýroparlament ekpe alǵandar men aýyryp shyqqandarǵa blok ishinde júrip-turýdy jeńildetetin sandyq jasyl sertıfıkat boıynsha óz pozıtsııasyn naqtylaıdy. Ári qaraı EO elderimen kelissóz júrgizilip, mamyrdyń aıaǵyna deıin kelisimge kelý kózdelip otyr. Ózindik vaktsınalyq pasporttar Frantsııa men Danııada qoldanysqa engen, degenmen olar EO-nyń basqa elderine sapar jasaýǵa artyqshylyq bermeıdi.

Kovıdten dári

Amerıkalyq-nemis farmatsevtıkalyq kompanııasy Pfizer-BioN-Tech ónidiristi jalǵastyrýda, aǵymdaǵy jyldyń aıaǵyna deıin Covid-19-dan dári óndirmek.

Kontsernniń bas dırektory Albert Býrlanyń aıtýynsha, preparat aýrýdyń alǵashqy belgileri paıda bolǵan kezde qabyldaýǵa arnalady.

Eýropada taǵy ne bolyp jatyr?

Ispanııa bıligi sandyq sertıfıkattar júıesin engizip, maýsymnan bastap eldi sheteldikterge ashýdy josparlap otyr. Osyndaı jospardy Horvatııa men Portýgalııa da qarastyrýda.

Gretsııa dúısenbiden bastap jeti elden kelgender úshin mindetti karantındi alyp tastady.

Brıýsselde jaqyn kúnderi Brıtanııa men EO elderimen shekarany ashý jáne jazǵy demalys kezinde júrip-turý sharttary týraly kelissóz júrgizilmek.

Brıtanııa eýropalyq elder arasynda halyqty vaktsınalaý qarqyny boıynsha kósh bastap tur. Qoǵamdyq densaýlyq saqtaý departamentiniń málimetinshe, 33,8 mln eresek brıtandyq kem degende alǵashqy dozany alyp, árbir tórtinshi adam tolyq vaktsınalanǵan.

Kıpr 10 mamyrdan bastap 65 eldiń vaktsınalaýdyń tolyq kýrsyn alǵan azamattaryna elge erkin kirýge ruqsat etedi. Ol úshin vaktsınanyń eki dozasyn alǵany týraly rastaý qaǵazyn kórsetse bolǵany.