Álemdegi koronavırýs: Frantsııa jumysta maska taǵýdy mindettedi. Brazııalyqtar depressııaǵa tústi
LONDON. QazAqparat – Frantsııa jumys ornynda maska taǵýdy mindetteýde, Ońtústik Koreıa buqaralyq sharalarǵa qaıta tyıym salýda, Avstralııada krýızdik laıner aınalasynda daý týyndap keledi, Latyn Amerıkada halyq karantın talaptaryn saqtamaı otyr – koronavırýsqa qatysty álemdegi ahýal jóninde QazAqparat VVS-ge silteme jasap habarlaıdy.
Tedros Gebreıesýs: Birge ǵana jeńe alamyz
COVID-19-ǵa qarsy vaktsına ázirleýde birneshe el nátıjeli jumys kórsetýine oraı Dúnıejúzilik densaýlyq saqtaý uıymynyń basshysy Tedros Gebreıesýs DDU-ǵa múshe barlyq memlekettiń úkimetine hat joldap, keleshekte paıda bolatyn bul vaktsınalarmen óz halqyn ǵana emes, oǵan muqtajdardyń barlyǵyn qamtamasyz etýge úndedi.
«Bizge «vaktsınalyq ultshyldyqty» doǵarý qajet. Jahandyq strategııa árbir memlekettiń ulttyq múddesine bir mezgilde jaýap beredi. Barlyǵy qaýipsiz bolmaıynsha, eshkim ózin qaýipsiz sezine almaıdy», - delingen qujatta.
Frantsııa jumys ornynda maska taǵýdy mindetteýde
1 qyrkúıekten bastap Frantsııada bir adamnan artyq otyratyn barlyq jabyq mekemelerde maskany taǵyp júrý talaby engizildi. Eńbek mınıstri Elızabet Bornnyń aıtýynsha, el úkimeti mundaı sheshimge kásipodaqtarmen keńeskennen keıin kelgen.
Ońtústik Koreıa buqaralyq sharalarǵa qaıta shekteý engizýde
Seýlde jáne oǵan jaqyn ornalasqan Inchhon iri portynda jabyq mekemelerde 50 adamnan kóp kez kelgen sharany ótkizýge taǵy tyıym salyndy, barlar men karaoke-klýbtar jabylyp jatyr. Koronavırýsty jeńdi dep eseptelgen bul elde syrqattardyń sany besinshi kún qatarynan eselep artyp keledi. Seısenbi kúni 246 adam tirkeldi. Keı jerlerde ınfektsııanyń taralýyna dinı jınalystar da sebep boldy.
Avstralııada krýızdik laıner aınalasynda daý-damaı týyndap keledi
Bortynda COVID-19-ǵa shaldyqqan naýqas bolǵan «Rýbı prıntsess» krýızdik laıneriniń 2650-ge jýyq jolaýshysyna 19 naýryz kúni Sıdneıde jaǵalaýǵa túsýge jáne úılerine oralýǵa ruqsat berilgen bolatyn. Alaıda, jolaýshylardyń eshqaısysyna koronavırýsqa test jasalmaǵan. Keıinnen olardyń 1 myńǵa jýyǵy ınfektsııamen aýyryp, 28-i qaıtys boldy. Senattyq tekseris anyqtaǵandaı, bul Jańa Ońtústik Ýels shtatynyń aýyl sharýashylyǵy, sý resýrstary jáne qorshaǵan orta departamenti, densaýlyq saqtaý basqarmasy jáne shekara qyzmeti sheneýnikteriniń qateligi jáne kelisilmegen is-qımylynyń saldary boldy.
Brıtanııa depressııaǵa tústi
Ulttyq statıstıka bıýrosy 500 myń adamnyń arasynda ótkizgen saýalnama málimetine sáıkes, pandemııa kezinde depressııa belgisi paıda bolǵan brıtandyqtardyń sany eki ese artyp, 20 paıyzǵa jýyqtaǵan. Adamdar uıqy men tábettiń buzylýyna, ómirge qyzyǵýshylyqtyń joǵalǵanyna jáne enjarlyqqa shaǵymdanǵan. Suraqtarǵa jaýap bergenderdiń tek 3,5 paıyzy ǵana sońǵy aılarda kóńil-kúıleri joǵarylaǵanyn atap ótken. Pandemııa ásirese, jasy 40-tan tómen adamdarǵa, áıelderge, kedeıler men syrqattarǵa aýyr áser etýde. Nottıngem ýnıversıtetiniń psıhıatrııa professory Charlı Beıkerdiń sózinshe, halyqtyń kóńil-kúıin medıtsınalyq dıagnoz retinde emes, aınaladaǵy jaǵdaıǵa qalypty áser dep baǵalaýǵa bolady.
Latyn Amerıka turǵyndary karantın talaptaryn saqtaýǵa qulyqsyz
Býenos-Aıres jáne Argentınanyń ózge qalalarynyń myńdaǵan turǵyny áleýmettik qashyqtyqqa qatysty óz kózqarasyn tanytý maqsatynda dúısenbi kúni sherýge shyqty. Argentına astanasynda shekteýler 20 naýryzda engizilgen jáne mınımým 30 tamyzǵa deıin kúshinde bolady. Argentınada koronavırýsqa shaldyqqandar sany 300 myńǵa jýyqtady. Olardyń 90 paıyzy el astanasynda anyqtalǵan. «Búgingi kúni eń jalǵyz dárý – qozǵalysty barynsha shekteý jáne adamdardyń qarym-qatynasty toqtatýy», - dedi prezıdent Alberto Fernandes. Degenmen, kórshi Brazılııada koronavırýsqa shaldyqqandar sany 12 esege kóp jáne 100 myńnan astam adam qaıtys boldy. A.Fernandestiń áriptesi Jaır Bolsanarý koronavırýsqa «qarapaıy tumaý» retinde qaraıtynyn aıtyp keledi. Brazılııa vıtse-prezıdenti Amılton Moýran VVS-ge bergen suhbatynda elde shekteý sharalaryn engizý nátıje bermeıtinin atap ótti. Sebebi «brazılııalyqtar tártip ustanatyndardyń qataryna jatpaıdy».
Ózge elderde...
Fýtboldan Frantsııa chempıonatynyń «Olımpık» jáne «Sent-Eten» arasyndaǵy Alǵashqy matchy 21 tamyzdan 16 jáne 17 qyrkúıekke aýystyryldy. Sebebi marseldik klýbtyń 4 oıynshysynan koronavırýs anyqtalǵan.
Ispanııada COVID-19-dyń qaıta órshýi týrızm salasyn jandandyrýǵa kedergi bolmaq. Dúısenbi kúni bul elde indettiń 1833 jańa jaǵdaıy tirkeldi. Bul, bir aı burynǵy kórsetkishten 3 eseden astamǵa kóp. Karantındik shekteýler alynyp tastalǵan 1 shildeden bastap eń kóp tirkelgen naýqastar sany juma kúni boldy – 2987.
Gretsııa jeltoqsan aıynda eýropalyq odaq bólgen kvota boıynsha koronavırýsqa qarsy 3 mln doza vaktsına alady. Oksford ýnıversıteti jáne AstraZeneca farmatsevtıkalyq kompanııasy ázirlegen vaktsınany synaqtan ótkizý qarasha aıynda aıaqtalýy tıis.
Al Fınlıandııa premer-mınıstri Sanna Marın jeńil respıratorlyq sımptomdarǵa baılanysty ózin-ózi oqshaýlap, koronavırýsqa test tapsyrdy. Bul, onyń sońǵy ýaqytta tapsyrǵan tórtinshi testi.
