Álemdegi koronavırýs: Ázerbaıjanda kovıd tólqujaty engizildi

NUR-SULTAN. QazAqparat – Ázerbaıjanda kovıd tólqujaty engizildi. Árbir úshinshi amerıkandyq koronavırýspen aýyrǵan bolýy múmkin, dep habarlaıdy QazAqparat COVID-19 taralýyna jol bermeý jónindegi VAK-tyń Telegram paraqshasyna silteme jasap.

Ázerbaıjanda meıramhanalar men saýda ortalyqtaryna barǵan kezde talap etiletin mindetti kovıd tólqujaty engizildi. Bul qujat úılený toıyna barǵan kezde de qajet bolady. Mundaı talap eldegi Mınıstrler kabınetiniń qaýlysymen qabyldandy.

AQSh. Epıdemıologııalyq modeldeý árbir úshinshi amerıkandyqtyń 2020 jyly koronavırýspen aýyrǵan bolýy múmkin ekendigin kórsetedi. Ǵalymdardyń pikirinshe, ótken jyly 110 mıllıonnan astam AQSh turǵyny SARS-CoV-2 vırýsyn juqtyrǵan bolýy ábden múmkin, mundaı zertteý nátıjesin Nature ǵylymı jýrnaly jarııalady.

DDU Kolýmbııada anyqtalǵan koronavırýs shtamyn monıtorıngileý tizimine engizdi. Ol grek alfavıtiniń «mıý» árpimen belgilengen. Bul tizimdegi shtamdar aýrýdyń juqpalylyǵyna, aýyr aǵymyna áser etetin genetıkalyq ózgeristerge, sonymen qatar ımmýnıtet jáne dıagnostıkalaý men terapııadan alshaqtaý múmkindikterine ıe.