Álemdegi koronavırýs: Avstrııa men Iran jappaı lokdaýn engizýde
Osy ýaqytqa deıin Avstrııada iri dúkender jumys istemeıdi. Mektep oqýshylary qashyqtan bilim alady. Alpi respýblıkasynyń kantsleri Sebastıan Kýrts el bıliginiń muǵalimderge ınfektsııaǵa analızdi erikti túrde tapsyrýdy usynyp, turǵyndardyń ózge de toptaryn Rojdestvoǵa deıin testileý úshin jaǵdaı jasaýǵa nıetti ekenin habarlady.
Germanııada qarashanyń basynda engizilgen jarym-jartylaı karantın nátıjeleri baǵalanýda. GFR kantsleri Angela Merkel bul sharalardyń aýrýǵa shaldyqqandardyń eksponentsıaldyq ósimin toqtatýǵa múmkindik bergenin aıtty. Alaıda úkimet basshysy el azamattaryn pandemııaǵa baılanysty áleýmettik baılanystaryn odan da qatty shekteýge shaqyrdy. 16 federaldyq jerdiń basshysylarymen tolyqqandy tyıym salý máselesin kelisý múmkin bolmady.
Kovıdtiń birinshi tolqyny kezinde qatań shekteý engizýden bas tartqan Shvetsııa bıligi endi baǵytyn ózgertip otyr. 24 qarashadan bastap elde segiz adamnan kóp jınalýǵa tyıym salynady. 20 qarashadan bastap barlar, meıramhanalar men túngi klýbtarda saǵat 22-den bastap alkogol ónimderin satýǵa tyıym salynady. Sońǵy aptalarda elde COVID-19 vırýsyn juqtyrǵandar sanynyń ósimi baıqalyp otyr, osyǵan baılanysty densaýlyq saqtaý júıesine úlken salmaq túsken.
Shveıtsarııadaǵy Jeneva kantony qarashada koronavırýs juqtyrýdyń eń joǵary deńgeıi belgilengen Eýropa aımaqtarynyń qataryna kirdi. Mundaǵy júz myń turǵynnyń ishinde alty myń adam aýrý juqtyrǵan. Jergilikti aýrýhanalardyń dárigerleri dabyl qaqty. Jaǵdaı qatań karantın engizilgen soń (kantonda meıramhanalar men barlardan basqa, azyq-túlik satpaıtyn barlyq dúkender jabyldy) turaqtala bastady, alaıda áli de kúrdeli bolyp qalyp otyr.
VVS-diń habarlaýynsha, Iranda Covid-19 vırýsy saldarynan ólim oqıǵalarynyń kóbeıýine baılanysty senbiden bastap birinshi lokdaýn engizilip jatyr. Boljam boıynsha, táýlik ishinde ólim sany eki ese ósip, aýrýhanalar naýqastar aǵynyn qabyldaı almaı qalady.
«Úkimettiń bul qıratýshy vırýspen kúres júrgizý úshin lokdaýn engizýden basqa amaly joq. Men koronavırýstyń úshinshi tolqynymen kúres júrgizý úshin jappaı kúsh jumyldyrýdy jarııalaımyn», - dedi el prezıdenti Hasan Roýhanı.
Pandemııa bastalǵaly, elde aýrý juqtyrýdyń 558 myńnan astam oqıǵasy tirkelip, 41,4 myńnan astam adam qaıtys bolǵan.
AQSh-ta Covid-19 vırýsyna shaldyqqandar sany pandemııa basynan beri 11 mln adamnan asty, al aýrýhanalardaǵy patsıentter sany rekordtyq qarqynmen ósip jatyr. Elde koronavırýstan 250 myńǵa jýyq adam qaıtys boldy. Mıchıgan jáne Vashıngton shtattary qatań karantın sharalaryn engizgen. Sársenbiden bastap Mıchıganda joǵary synyp oqýshylary men kolledj stýdentteri onlaın-oqytýǵa aýysyp, meıramhanalar kelýshilerdi qabyldamaıdy.
Vashıngtonda sportzaldar, kınoteatrlar, teatrlar jáne murajaılar jabylady. Osy arada Aq úı jeltoqsannan bastap aıyna 20 mln amerıkandyq azamatqa vaktsına egýge nıetti ekenin málimdedi. Qazirgi kezde elde birde bir vaktsına resmı túrde maquldanǵan joq, dep habarlaıdy VVS.
Avstralııada karantın talaptaryn saqtaýǵa mindetti adamdar turyp jatqan qonaqúıdiń qyzmetkeri otbasynyń 13 múshesine vırýs juqtyrǵan. Aýrý juqtyrý oqıǵalary anyqtalǵan soń Ońtústik Avstralııa shtatynyń bıligi ótkizilip jatqan test sanyn kóbeıtip, jańa shekteýler engizdi. Naýryz aıynan bastap sheteldikterge elge kirýge tyıym salynǵan, biraq Avstralııa azamattary men qolynda turýǵa yqtııarhaty bar azamattar arnaıy qonaqúıde mindetti 14 kúndik karantınde bolý talabyn saqtasa, elge qaıtyp kele alady.
