Álemdegi qala turǵyndarynyń 80 paıyzdan astamy lastanǵan aýamen demalady
ASTANA. QazAqparat - Jer betinde qala turǵyndarynyń 80 paıyzdan astamy normadan asyp ketken lastanǵan aýamen demalady. Bul týraly Dúnıejúzilik densaýlyq saqtaý uıymynyń (DDSU) jańa baıandamasynda aıtyldy. Onyń avtorlary tabysy orta jáne tómen elderde aýa sapasy nasharlap bara jatqanyn aıtyp dabyl qaǵýda.
DDSU osy baıandamany ázirleý barysynda álemdegi júzden astam memlekettiń 3 myńdaı qalasyndaǵy aýa sapasyn tekserip shyqty.
Tabysy tómen nemese ortasha elderdegi 100 myńnan astam turǵyny bar qalalardyń 98 paıyzynda aýanyń sapasy halyqaralyq talaptar boıynsha uıǵaryndy lastaný deńgeıine jaýap bermeıtini belgili boldy. Aýqatty elderdiń ishinde qalalardyń 56 paıyzynyń turǵyndary lastanǵan aýamen tynys alady.
«Aýanyń lastanýy - adamdardyń aýrýǵa shaldyǵýy jáne mezgilsiz ólimniń basty sebepteriniń biri. Qaladaǵy aýa qatty lastansa, ol jastarǵa, qarııalarǵa jáne jaǵdaıy tómen jandarǵa zalalyn tıgizedi», - dedi DDSU bas dırektorynyń kómekshisi Flavııa Býstreo.
Eýropa jáne Amerıka, sonymen qatar Tynyq muhıtynyń batys bóligindegi aımaqtaǵy keı elderdiń aýasy taza sanalady. Sapasy tómen nashar aýa Shyǵys Jerorta teńizi aımaqtary men Ońtústik Shyǵys Azııa bóliginde taralýda.
Sarapshylardyń aıtýynsha aýa sapasynyń jaqsarýy halyq aýrýyn emdeýge ketetin shyǵyndy azaıtady.
