Álemdegi halyqtyń jartysy medıtsınaǵa qol jetkize almaı otyr - DDSU basshysy
«Sońǵy 40 jylda adamdardyń ómir súrý uzaqtyǵy aıtarlyqtaı uzardy. Biz sonymen birge, ana men bala ólimin aıtarlyqtaı azaıttyq. Densaýlyq saqtaý salasyndaǵy sátti qadamdardyń taǵy birqataryn mysal retinde keltirýge bolady. Álemdegi keıbir adamdar eń sońǵy medıtsınalyq tehnologııalarǵa qol jetkize alady. Al keıbiri tipti bazalyq deńgeıde ol qajettilikterge muqtaj. Jer betindegi halyqtyń jartysyna jýyǵy densaýlyq saqtaý salasynyń ómirlik mańyzy bar qyzmetine qol jetkize almaı otyr. 150 mıllıonǵa tarta adam kedeıshilikte ómir súrip jatyr. Medıtsınalyq qyzmet alý úshin sońǵy aqshasyn salýda», - deıdi ol.
Tedros Adhanom Gebreıesýstyń aıtýynsha, álemdik medıtsına sońǵy 40 jylda aıtarlyqtaı progreske qol jetkizgen.
«Biz aýrýlardyń belgili bir túrlerine qarsy kúreste kúsh-jigerimizdi biriktire bastadyq. Eń aldymen aýrýlardyń aldyn alýǵa basa mán berýimiz kerek. Deklaratsııa eń aldymen adamdarǵa nazar aýdarylýy kerektigin nusqaıdy. Sonymen birge, deklaratsııa aıasynda árbir adamnyń óz densaýlyǵyna jiti qaraýy kerektigi eskerilýi tıis. Sondaı-aq, densaýlyq saqtaý salasyna qatysty barlyq sektorda áleýmettik aspektilerdi de eskerý kerek», - deıdi Dúnıejúzilik densaýlyq saqtaý uıymynyń bas dırektory.
Onyń aıtýynsha, Almaty deklaratsııasy qabyldanǵan 1978 jyldan beri álem saıası jáne ekonomıkalyq turǵyda kóp ózgeriske ushyraǵan.
«Alaıda densaýlyqqa degen quqyq ózgergen joq. Bárimiz de adambyz. Qanymyz da, úmitimiz de, erik-jigerimiz de bir. Keıbirimizde basymdyq bar, keıbirimiz qajettilikke zárý bop ómir esigin ashtyq. Keıbireýlerdiń úlken armany bar. Al keıbirimiz tek ómirimizdi saqtap qalý úshin tirshilik etip jatyrmyz. Biraq, bárimizge ortaq maqsat - denimiz saý bolyp ómir súrý. Densaýlyq siz jaǵdaıyńyzdy jasap alǵannan keıin beriletin syıaqy bolmaýy kerek. Densaýlyǵyn qaratýǵa kez kelgen adam qol jetkize alatyndaı jaǵdaı jasaý kerek. Mine, sondyqtan biz barlyq áleýetimizdi osy maqsatqa jumyldyrýǵa tıispiz», - deıdi Tedros Adhanom Gebreıesýs.
Eske sala ketsek, elordada búgin medıtsınalyq-sanıtarlyq alǵashqy kómek jónindegi Jahandyq konferentsııa ótip jatyr. Jıynǵa álemniń 120 elinen medıtsına salasynyń basshylary men bilikti mamandar kelip otyr. Olardyń qatarynda Dúnıejúzilik densaýlyq saqtaý uıymynyń bas dırektory Tedros Adhanom Gebreıesýs, ıÝNISEF atqarýshy dırektory Genrıetta For, DDU Eýropa óńirlik bıýrosynyń dırektory Jýjanna ıAkab bar.