Álemdegi halyqaralyq qatynastardyń kúrdelenýi Qazaqstannyń áskerı qaýipsizdiginiń ózektiligin arttyra túsýde - E.Qarın

ASTANA. QazAqparat - Álemdegi halyqaralyq qatynastardyń kúrdelenýi eldiń ulttyq qaýipsizdigi júıesiniń negizgi bóligi bolyp tabylatyn Qazaqstannyń áskerı qaýipsizdiginiń ózektiligin arttyra túsýde. Bul týraly búgin konferentsııada QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erlan Qarın málim etti.

«Jalpy biz búgingi úderisterdi kórip otyrmyz, álemde memleketter arasyndaǵy halyqaralyq qatynastar qıyndaı túsken. Burynǵydaı koalıtsııalar, alıanstar qurylýda, bul óz kezeginde halyqaralyq saıasattyń kúrdelene túsýine yqpal etedi. Ókinishke qaraı, saıası arenada kereǵar kúshterdiń arasyndaǵy ahýal nasharlaýda, qarýly qaqtyǵystardyń qaýpi de órshelenip barady, biz buny Aýǵanstandaǵy oqıǵalardyń jelisinen baıqaı alamyz. Biz qazir Sırııa men Iraktaǵy ahýaldy da kórip otyrmyz. Bul eldiń ulttyq qaýipsizdik júıesiniń negizgi bóligi bolyp tabylatyn bizdiń áskerı qaýipsizdigimizdiń ózektiligin arttyra túsýde», - dep atap ótti E.Qarın.

QSZI basshysynyń aıtýyna qaraǵanda, osy baǵytta Qazaqstan úlken jumystar atqarýda.

Uzaq ýaqyt boıy áskerı basqarý únemi jetildirilip, áskerı jabdyqtar satyp alý júıesi jańǵyrtylyp keldi. Jańa qarý-jaraqtar paıda bolýda. Mamandardy oqytýdyń jańa júıesi engizildi. Áskerı jattyǵýlardyń jańa júıesi júzege asyrylýda. Osy sharalar, júıeli reformalar Qazaqstan Respýblıkasy Qarýly Kúshterin jańǵyrtýǵa múmkindik beredi, dep esepteıdi ol.

«Buryn áskerı jattyǵýlar bir jospar boıynsha óte beretin. Ol jattyǵýǵa emes, bir polıgonda ótetuǵyn jaı ǵana atysqa uqsaıtyn. Byltyrdan bastap, jańa ádister qoldanyla bastady. Josparly emes tekserister arqyly áskerı qurylymdar men kúshterdiń daıyndyǵy saralanady. Osy jattyǵýlardyń barysynda túrli áskerı qurylymdardyń birlesip is-qımyl jasaý múmkindikteri baǵalanady: jedeldik, ózara túsiný, jetkizý jáne uıymdastyrý. Naqty áskerı manevrler qoldanylady. Bul saýaldardyń barlyǵy kásibı turǵyda jaqsaryp kele jatqandyǵyn kórip otyrmyz», - dedi sarapshy.

«Degenmen áli de bolsa máseleler bar. Bul jańa tehnıkamen qamtý máseleleri. Munda bir mańyzdy aspekti bar - ol ishki rezervterdi qamtamasyz etý. Sońǵy kezde Úkimet áskerı tehnıka shyǵaratyn óz óndiristerimizdi jáne sheteldik zaýyttardy elimizde salýdy qolǵa alyp otyr», - dep atap ótti E.Qarın.

Onyń oıynsha, osy baǵyttaǵy jumysty jalǵastyra berý kerek.