Álemdegi et óńdeý boıynsha eń alpaýyt eki kompanııanyń biri Qazaqstanǵa kele jatyr

NUR-SULTAN. QazAqparat – Amerıkalyq «Tyson Foods» kompanııasynyń Qazaqstanda et óńdeıtin keshen salatyny jaıly «Ashyq dıalog» baǵdarlamasynda QR Aqparat jáne qoǵamdyq damý mınıstri Dáýren Abaev aıtyp berdi, dep habarlaıdy QazAqparat tilshisi.

««Tyson Foods» kompanııasy týraly qandaı málimetti bilý mańyzdy? Ol – et óndirisi boıynsha búkil álem boıynsha eń alpaýyt ekinshi kompanııa. «Tyson Foods» korporatsııasynyń óndiristik kásiporyndary tek úsh memlekette bar. Olar: AQSh, Qytaı jáne Úndistan. Biz bul rette tórtinshi memleket bolyp otyrǵanymyzdy atap ótý kerek. Olar Qazaqstan aýmaǵynda zamanǵa saı et óńdeıtin, táýligine 2 myń bas soıylatyn keshen salýdy kózdep otyr. Jobanyń ınvestıtsııalyq kólemi – 500 mln AQSh dollary shamasynda bolady», - dedi Dáýren Abaev «Ashyq dıalog» baǵdarlamasynda.

Mınıstrdiń aıtýynsha, osyndaı ınvestordyń bizdiń elge kelip jatqany – búkil álemniń iskerler ortasy úshin aıtarlyqtaı aıqyn sıgnal sanalady.

«Kásiporyn eksporttyq baǵytta jumys júrgizedi. Alys-jaqyn shetelderge et tasymaldaıdy. Ol úshin osynda – Qazaqstanda aýqymdy jumys júrgizilgenin aıta ketý kerek. Bizdiń mamandar veterınarlyq talaptardy bekitý baǵytynda orasan zor jumys istedi. Eń birinshi kezekte, bizdiń memleketti qus tumaýy men basqa da qaýipti aýrýlardan taza aýmaq retinde moıyndatý kerek edi. Búkilálemdik banktiń sarapshylary Qazaqstandy aýyl sharýashylyǵyn damyta alatyn memleketterdiń bestigine engizedi. «Tyson Foods» sekildi kompanııanyń Qazaqstanǵa kelýiniń mańyzy óte zor. Óıtkeni, bul tanymal brend, tehnologııa men jumys oryndary, salyq túsimderi», - dedi ol.

Eske sala ketsek, QR Premer-Mınıstri Asqar Mamınniń AQSh-qa jumys sapary aıasynda amerıkalyq agrobıznes ókilderimen Qazaqstanda et óńdeý kásiporyndaryn jáne sýarý júıeleri óndirisin ashý týraly ýaǵdalastyqtarǵa qol jetkizilgen bolatyn.