Álemdegi epıdahýal: Koronavırýs tek Azııanyń ońtústik-shyǵys aımaǵynda báseńdegen
NUR-SULTAN. QazAqparat – Búkil álemde tek ońtústik-shyǵys Azııa aımaǵynda koronavırýs ınfektsııasynyń taralý deńgeıiniń báseńdegeni baıqalady. Úkimet otyrysynda Densaýlyq saqtaý mınıstri Alekseı Tsoı osyndaı málimetti aıtyp ótti, dep habarlaıdy QazAqparat tilshisi.
«Koronavırýs pandemııasy búkil álemdi sharpydy. Medıtsınalyq kómektiń qoljetimdiligine, qabyldanǵan karantın sharalaryna, halyqtyń saqtyq sharalaryn saqtaýyna qaraı indettiń qarqyny álemniń ártúrli elderinde árqıly sıpatta taralýda. Búgingi tańda álemniń 220 elinde koronavırýs ınfektsııasyn 95 mıllıon adam juqtyrǵan. 2 mıllıonǵa jýyq azamat kóz jumyp, indetten kelgen ólimniń álemdik kórsetkishi 2,1 paıyzdy quraıdy. Amerıka, Tynyq muhıtynyń batys bóliginde jáne Afrıkada halyqtyń indetti juqtyrý kórsetkishi áli de jalǵasýda. Eýropada, batysqa qaraı Jerorta teńizi aımaǵynda da indettiń betin qaıtarlyq túri joq. Koronavırýstyń báseńdeý jaǵdaıy tek ońtústik-shyǵys Azııa aımaǵynda baıqalady», - dedi Alekseı Tsoı Úkimet otyrysynda.
Onyń aıtýynsha koronavırýstyń taralýy jaǵynan Qazaqstan «sary» aımaqta tur.
««Sary» aımaqta sonymen qatar Túrkııa bar. «Qyzyl» aımaqta Ýkraına, RF, Belarýs, Germanııa, Italııa, Frantsııa, BAÁ bar. Ońtústik Koreıa men Sıngapýr «jasyl» aımaqta», - dedi mınıstr.
