Álemdegi eń jaıly qalalar reıtınginde Almaty 177-orynda tur
Ómir súrýge qolaıly jaǵdaı jasalǵan álem qalalarynyń «Quality of living city ranking» reıtıngisinde Almaty shahary 177-orynda tur. Mundaı derek «Astanany damytýdyń keıbir máseleleri týraly» zań jobasynyń konsýltatıvtik qujatynda jazylǵan, dep habarlaıdy QazAqparat tilshisi.
«Mercer» halyqaralyq konsaltıng kompanııasy jyl saıyn ómir súrýge eń qolaıly qalalardyń reıtıngin jarııalaıdy (Quality of living city ranking). Osy reıtıngtegi barlyq qalalar mynadaı kórsetkishterdiń mańyzdy toptary boıynsha baǵalanady: áleýmettik ortanyń sapasy, mádenı ómir, saıası turaqtylyq deńgeıi, bilim deńgeıi, kólikke qoljetimdilik, bıznes úshin tartymdylyq. Jalpy, «Mercer» agenttigi álemdegi eń tanymal 200-den astam qalanyń ómir súrý sapasyn baǵalaıdy. Qazaqstan shaharlarynan bul reıtıngte tek Almaty bar. Ol álemniń 231 qalasy arasynda 177-shi orynda», - delingen Ashyq NQA portalynda jarııalanǵan konsýltatıvtik qujatta.
Sonymen qatar álemniń 172 qalasynda ómir súrý jáne qyzmet kórsetý sapasyn baǵalaıtyn «Economist intelligence unit» reıtıngisinde Almaty jalpy 100-den 65,3 ball jınaǵan.
«Almatynyń turaqty damýy 75 ball deńgeıinde, densaýlyq saqtaý salasy - 66,7 ball, mádenıet jáne qorshaǵan orta – 57,6, bilim – 66,7, al ınfraqurylym – 60,7 ball. Reıtıng avtorlary atap ótkendeı, bul óte jaqsy nátıje», - dep jazylǵan ashyq talqyǵa shyǵarylǵan qujatta.
