Álemdegi eń záýlim turǵyn úıdiń qurylysy aıaqtaldy
ASTANA. QazAqparat - Nıý-Iorkte álemdegi eń záýlim turǵyn úıdiń qurylysy aıaqtaldy. Bıiktigi 423 metrge jetetin 96 qabatty ǵımarat ataqty Empire State pen Chrysler Building sııaqty eńseli úılerden de asyp túsedi. Barlyq qabattar salynyp bolǵanymen, endi ishki jumystar qalyp tur, dep jazady khabar.kz.
Turǵyndar úshin úı bir jyldan soń paıdalanýǵa berilmek. Nıý-Iorktyń eń tańdaýly aýdany Manhettende ornalasqan úıde 104 páter bar. Olardyń baǵasy 16 mıllıonnan bastalyp, 95 mln. AQSh dollaryna deıin barady. Tóbesi kók tiregen ǵımarat álemdegi eń bıik turǵyn úı sanalǵan Dýbaıdaǵy Princess Tower ǵımaratynan da 10 metrge bıik.
Biraq, amerıkalyq úıdiń bul mártebesi uzaqqa barmaıtyn sııaqty. Sebebi, aldaǵy jyly Úndistannyń Mýmbaı qalasynda bıiktigi 442 metrge jetetin «Álemdegi birinshi» degen ataýǵa ıe bolǵan turǵyn úıdiń qurylysy aıaqtalýy kerek.
