Álemdegi eń yqpaldy áıelder
ASTANA. 2 qarasha. QazAqparat - Jýyrda Forbes jýrnaly álemniń eń yqpaldy adamdarynyń reıtıngin jarııalaǵan edi. Álemdegi eń bedeldi saıasat, qoǵam qaıratkerleri men bıznes ókilderinen quralǵan tizimge toǵyz názik jandy azamatshalar engen, dep habarlaıdy RBK. Tórtkúl dúnıedegi eń bedeldi áıelderdi biz de sanamalap keteıik.
Germanııa kantsleri Angela Merkel
Názik jandylar arasyndaǵy kósh bastap turǵan A. Merkel jalpy reıtıngte de joǵary tur. Ol besinshi orynda.
Brazılııa Prezıdenti Dılma Rýsef
Ol reıtıngte 20-satyǵa ıe boldy.
Úndistan ulttyq kongresiniń kóshbasshysy Sonıa Gandı
Reıtıngte 21-orynda.
HVQ dırektory Krıstın Lagard
Halyqaralyq valıýta qorynyń tarıhyndaǵy alǵashqy áıel-basshy 35-orynnan kórindi. Sońǵy eki jyl ómirin eýroaımaqtaǵy daǵdaryspen kúreske arnap keledi.
Ońtústik Koreıa Prezıdenti Pak Kyn He
52-orynda. Ońtústik Koreıa tarıhyndaǵy alǵashqy áıel-prezıdent.
IBM bas dırektory Vırdjınııa Romettı
Álemdik kóshbasshylar tiziminde 56-orynda. 2011 jyly kompanııanyń bir ǵasyrlyq tarıhyndaǵy birinshi basshy áıel atandy.
Dúnıejúzilik densaýlyq saqtaý uıymynyń bas dırektory Margaret Chan
Reıtıngte 59-satydan kórindi.
New York Times bas redaktory Djıll Abramson
Reıtıngtiń 68-satysyn baspasóz ókili ıemdengen.
AQSh Federaldyq rezerv júıesi Basqarýshylar keńesi tóraǵasynyń orynbasary Djanet Iellen
2010 jyly ony bul qyzmetke Barak Obama taǵaıyndaǵan bolatyn.
2011 jáne 2012 jyldary kóshbasshylar reıtıngisine alty áıel ense, 2010 jyly tek bes áıel, 2009 jyly tek qana úsh názik jandy tizimde boldy. Esterińizge sala keteıik, kóshbasshylar reıtınginde RF prezıdenti Vladımır Pýtın top jardy. AQSh prezıdenti Barak Obama - ekinshi, QHR Tóraǵasy Sı Tszınpın - úshinshi, Rım Papasy Frantsısk tórtinshi oryn aldy. Altynshy orynda Bıll Geıts, AQSh Federaldyq rezerv júıesi Basqarýshylar keńesiniń tóraǵasy Ben Bernanke jetinshi orynda. Segizinshi satynyAbdýlla ıbn Abdýl Ázız (Saýd Arabııasynyń koroli) ıelense, Eýropanyń Ortalyq bankiniń basshysy Marıo Dragı toǵyzynshy oryn aldy. Wall Mart dırektorlar keńesiniń tóraǵasy Maıkl Dıýk úzdik ondyqty qorytyndylap tur.
