Álemdegi eń ýly fýgý balyǵy Japonııada ashyq satylymǵa tústi
ASTANA. 4 qarasha. QazAqparat - Álemdegi eń qaýipti delıkates - fýgý balyǵy japonııalyq astanada ashyq satylymǵa tústi.
Buryn Tokıoda fýgý satý boıynsha qatań shekteýler boldy. Endi ákimshilik tutynýshylardyń qysymymen shegindi. Tapsyrysty arnaıy ǵalamtor saıtynan jasaýǵa bolady.
Bılik kózderi balyqty tek lıtsenzııa alǵan mamandar ǵana bóle alatyny týraly eskertedi. Fýgýdyń quramynda júıke-sal dertine ushyratatyn ý - tetrodotoksın bar. Onyń aǵzaǵa túsýi oqıǵalarynyń 60 paıyzy ólimmen aıaqtalady. Balyqtyń ishki músheleri men terisi asa ýly. Bólgennen keıin bul qaldyqtardy qalǵan qoqystan bólek joıyp jiberý kerek. Jyl saıyn ýlanýdan birneshe ondaǵan adamdar mert bolady, basym bóligi - ýly balyqty ózderi daıyndaǵandar.
