Álemdegi eń úlken ushaq Almaty áýejaıyna kelip qondy
ALMATY. QazAqparat – Almaty áýejaıyna dúnıedegi eń úlken An-225 «Mrııa» ushaǵy kelip qondy, dep habarlaıdy QazAqparat tilshisi.
Ýkraınadan shyqqan eń úlken júk ushaǵy Almaty áýejaıyna janarmaı quıýǵa toqtady.
Bort Qytaıdyń Tıantszın áýejaıyna COVID-19 qarsy kúres quraldary men medıtsınalyq qural-jabdyq alý úshin attanǵan.
Tıantszınnen Almatyǵa tranzıt arqyly Polshaǵa ushady.
«Álemdegi eń iri júk kóligi Qytaıdan 7 mln R2 maskasy men júz myńdaǵan qorǵanys kostıýmderin jetkizbek. Jetkizý operatsııasyn KGHM Polska Miedź jáne Grupa Lotos polshalyq kompanııalary uıymdastyryp otyr»,- dedi áýejaıdan.
Mrııa ushaǵy 1988 jyly Kıevte jasalǵan. Álemde mundaı ushaq ázirge bireý-aq.
Ýkraına kólik strategııasy ortalyǵy habarlaǵandaı, bul - alyp ushaqtyń 2018 jylǵy kúzden bergi birinshi sapary.
Polshalyq BAQ habarlaýynsha , álemdegi eń iri júk kóligi Varshavaǵa 14 sáýir tańǵy 09.30-da jetedi.
