Álemdegi eń úlken ushaq alǵashqy reısin jasady
NUR-SULTAN. QazAqparat - Emirates áýe kompanııasy álemdegi eń úlken A380 serııalyq avıalaınerin reıske qosty. Alyp ushaq Dýbaıdan Maskatqa qatynaıdy, dep habarlaıdy VVS.
Birikken Arab Ámirliginiń eń iri qalasy men Oman astanasynyń arasyndaǵy qashyqtyq - 340 shaqyrym.
Áýe kemesi shamamen 40 mınýttaı ushady. Biraq bul ýaqytta laıner ózi taqylettes basqa ushaqtar ushatyn bıiktikke kóterile almaıdy. Ádette mundaı alyptar shamamen 10 km jáne odan da bıikten ushady. Al Dýbaı-Maskat reısimen ushatyn A380 eń arysy 5791 metrge kóteriledi.
Kompanııanyń málimdeýinshe, eki jaqqa qaraı kúnine eki reıs uıymdastyrylady. Oǵan eki Airbus A380 jumyldyrylǵan. Ushaqtyń ekonom-klasynda 429 oryn, bıznes-klasta - 76, al birinshi klasta 14 oryn bar.
Aıta keteıik, Emirates áýe kompanııasy A380 ushaǵymen eń alys qashyqtyqqa da tikeleı reıs jasap keledi. Ushaqtar jańa Zelandııanyń Oklend qalasynan Dýbaıǵa deıin shamamen 17 saǵat (keri baǵytpen 15 saǵat) ushady, al eki qala arasyndaǵy qashyqtyq 14 myń shaqyrymnan asyp túsedi.
