Álemdegi eń úlken shyrshalar
ASTANA. 30 jeltoqsan. QazAqparat - Álemdegi eń úlken shyrsha Italııanyń Gýbbıo (Ýmbrııa) kommýnasynda ornatylǵan.
Indjıno taýyna arqa súıep turǵan kompozıtsııany shyrsha dep ataý qıyndaý, alaıda onyń túri soǵan saıady. Bıiktigi - 650 metr, eni - 350 metr. Shyrshanyń bel ortasy 260 shyraqpen bezendirilgen, al joǵary bóligine 200 shyraǵdan qajet bolǵan. Mundaı shyrsha Indjıno taýyna alǵash ret 1981 jyly ornatylǵan, alaıda ol tek 1991 jyly ǵana Gınnesstiń rekordtar kitabyna engen. Odan keıin eń orasan jasandy jańajyldyq shyrsha álemdik rekordtar kitabyna 2009 jyly tirkelgen eken. Ol Meksıkanyń Paso-de-la-Reforma dańǵylyna ornatylypty. Onyń dıametri - 35 metr, bıiktigi - 110,35 metr, sýrettep aıtqanda, onyń kólemi 40 qabatty turǵyn úıge saı keledi. Mundaı orasan shyrshany ornatý úshin 200 jumysshyǵa eki aı merzim qajet bolǵan. Sondaı-aq oǵan jalpy salmaǵy 330 tonnany quraıtyn metall qurastyrmalar jumsalǵan, al elektrmen jaryq shashatyn bezendirýshiniń uzyndyǵy 80 myń metrdi qurapty. Taǵy bir qyzyq mysal: Rıo-de-Janeıronyń Lagoa-Rodrıgo-de-Fretas kólinde de júzip júretin úlken shyrsha boı kótergen, onyń bıiktigi 85 metrdi quraǵan, al odan 2 mıllıon shyraǵdan jalt-jult etip, sý betine shaǵylysqanda kókpen tirkesken patshalyqtyń tylsym tańǵajaıyp dúnıesine kýá bolasyz, dep jazady "Alash aınasy" basylymy.
