Álemdegi eń úlken oıynhana - Qytaıdyń Makao shaharynda
ASTANA. 4 maýsym. QazAqparat - Bir tań qalarlyq jaıt, álemdegi eń úlken oıynhana oıynqumarlar qalasy Las-Vegasta emes, Qytaıdyń Makao shaharynda oryn tepken,
dep jazady «Alash aınasy» gazeti.
«Venetian Macao» qurylys kesheni Azııa aýmaǵyndaǵy eń úlken ǵımarattyń esebinde. Bul ǵımarattyń úlkendigi álem boıynsha Vashıngtondaǵy «Boeing» kompanııasynyń zaýyt kesheninen keıingi ekinshi oryndy alady. Keshenniń jalpy alańy 945 myń sharshy metrdi qurasa, al onyń quny 2,4 mıllıard dollar esebinde baǵalanady.
Ǵımarattyń qurylysy 2007 jyly tolyǵymen aıaqtalǵan. Venetsııalyq stılde salynǵan 40 qabatty ǵımarattyń 4 myń qonaq úı nómri, aýmaǵy 111 myń sharshy metrdi quraıtyn kórme ótkizýge arnalǵan pavılon, úlken saýda ortalyǵy, 30 restoran, 350 dúken, 1,8 myń adam syıatyn konferents zaly bar.
