Álemdegi eń úlken krýızdik laıner alǵash ret júzip shyqty
ASTANA. QazAqparat - Álemdegi eń úlken krýızdik Harmony of the Seas jolaýshylar laıneri frantsýzdyń Sen-Nazer qalasynyń portynan alǵash ret júzip shyqty. Bul týraly Agence France-Presse (AFP) agenttigine silteme jasap Lenta.ru habarlaıdy.
Keme aldymen Ulybrıtanııanyń ońtústik jaǵalaýyndaǵy Saýtgempton portyna soǵyp, bortyna alǵashqy jolaýshylardy alady. Budan keıin Harmony of the Seas ońtústikke qaraı jol tartyp, Pıreneı túbegin aınalyp ótip, Jerorta teńizi boıynsha krýızge attanady. Sodan keıin sońǵy aıaldama Barselonaǵa (Ispanııa) júzip keledi.
Agenttiktiń habarlaýynsha, kemeniń uzyndyǵy 362 metr, eni - 66 metr, bıiktigi - 72 metr. Laınerdiń bortyna 6360 jolaýshy jáne eki myńnan asa ekıpaj músheleri sııady. Harmony of the Seas óziniń ıesi Royal Caribbean International (RCI) kompanııasyna 12 mamyrda berildi.
2016 jylǵy aqpanda jelide krýızdik laınerdiń fotosýreti paıda boldy. Harmony of the Seas dvıgateliniń konstrýktsııasy jaqsartylyp, jaryqdıodty jaryqtandyrý paıdalanýdyń arqasynda basqa iri kemelerden 20 paıyzǵa tıimdi bolady, dep habarlanǵan bolatyn.
