Álemdegi eń tanymal áýe baǵdarlarynyń reıtıngi jarııalandy
ASTANA. QazAqparat - Routes avıatsııalyq onlaın qyzmeti álemdik jolaýshylar legin saralap, adamdardyń eń kóp júretin áýe baǵdarlaryn atady, dep habarlaıdy QazAqparat The Independent saıtyna silteme jasap.
Belgili bolǵandaı, saıahattaýshylardyń arasynda eń taralǵan baǵdar Seýldan (Ońtústik Koreıa) Chedjý aralyna ushatyn reıs ekeni anyqtaldy. 2017 jyly bul baǵdarda 13 mıllıon adam jol júrgen. Onlaın qyzmettiń málimetterine sáıkes, áýe kemeleri kún saıyn Ońtústik Koreıanyń astanasynan aralǵa 180 ret ushqan. Ekinshi orynǵa Melbýrn-Sıdneı baǵdary ornalasty. Munda 2017 jyly 10 mıllıonǵa jýyq saıahatshy jol júrgen. Halyqaralyq ushý baǵyttarynyń arasynda úzdikterdiń qataryna 6,7 mıllıon áýe jolaýshylary ushqan Gonkong-Taıbeı reısi de kirdi.
