Álemdegi eń qymbat qalalar reıtınginde Nıý-Iork kósh bastady, Almaty 166-orynda
ASTANA. QazAqparat – Economist brıtan jýrnalynyń taldaý bólimi eń qymbat qalalardyń kezekti reıtıngisin jarııalady, dep habarlaıdy QazAqparat VVS-ge silteme jasap.
2022 jylǵy reıtıng qorytyndysy boıynsha Nıý-Iork pen Sıngapýr kósh bastady.
Reıtıngti jasaǵan Economist Intelligence Unit álemniń 172 iri qalasynda baǵa bir jylda 8,1% kóterilgenin atap ótti.
Bul – jýrnal álemdegi ómir súrý quny týraly derekterdi jınaǵan sońǵy 20 jyl ishindegi eń úlken kórsetkish.
Nıý-Iork alǵash ret álemdegi eń qymbat qalalar reıtıngisinde kósh bastady.
Bul AQSh-taǵy joǵary ınflıatsııa men dollardyń joǵary baǵamyna baılanysty bolyp otyr. Ótken jyly Tel-Avıv birinshi orynda bolsa, qazir ol úshinshi orynda tur.
2022 jylǵy álemdegi eń qymbat qalalar:
1. Nıý-Iork
2. Sıngapýr
3. Tel-Avıv
4. Gonkong
5. Los-Anjeles
6. Tsıýrıh
7. Jeneva
8. San-Frantsısko
9. Parıj
10. Sıdneı
10. Kopengagen
Tizimdegi barlyq qarastyrylǵan qalalardyń ishinde Reseıdiń Máskeý jáne Sankt-Peterbýrg megapolısterinde úlken ózgeris baıqaldy.
Olar sáıkesinshe birden 88 jáne 70 pozıtsııaǵa aýysty (2022 jylǵy jalpy reıtıngte Reseı astanasy - 37, al Sankt-Peterbýrg - 73-orynda).
Baıandama avtorlary atap ótkendeı, kapıtal qozǵalysyn baqylaý, ımportty shekteý jáne eýropalyq gaz tólemderin rýblge aýdarý Reseı valıýtasyn nyǵaıtýǵa kómektesti.
Sonymen qatar, Reseıdiń ózinde baǵa 2022 jyldyń aqpanynda RF-ǵa salynǵan sanktsııalarǵa baılanysty kóterildi.
Zertteý avtorlarynyń aıtýynsha, Máskeýdegi ınflıatsııa ótken jylmen salystyrǵanda - 17%, al Sankt-Peterbýrgte - 19,4% qurady.
Lıvııanyń Trıpolıi men Sırııa astanasy Damask – álemdegi eń arzan qalalar.
Sondaı-aq olardyń qatarynda Qazaqstannyń eń iri qalasy Almaty men Ózbekstan astanasy Tashkent te bar.
Eń arzan qalalar:
161. Kolombo
161. Bangalor
161. Aljır
164. Chennaı
165. Ahmedabad
166. Almaty
167. Karachı
168. Tashkent
169. Týnıs
170. Tegeran
171. Trıpolı
172. Damask
