Álemdegi eń qymbat fýtbolshy komandasyn aýystyrmaq
NUR-SULTAN. QazAqparat. – Frantsııanyń PSJ fýtbol klýby 21 jastaǵy shabýylshy Kılıan Mbappeni satýǵa daıyn somany atady, dep habarlaıdy QazAqparat «The Sun» saıtyna silteme jasap.
Mbappe PSJ-da 2017 jyldan bastap oınaıdy jáne sodan beri komandada 124 match ótkizip, 90 gol soqqan. Parıj quramasy sapynda úsh ret Frantsııa chempıonatyn jeńip alyp, el kýbogi men Lıga kýboginiń ıegeri atandy.
Jyl basynda «CIES Football Observatory» zertteý ortalyǵy álemdegi eń qymbat fýtbolshylardyń jańartylǵan reıtıngin usyndy. Ol kezde birinshi oryn Mbappege tıesili boldy, onyń quny 265,2 mıllıon eýroǵa baǵalandy.
Basylymnyń málimetinshe, shabýylshy komandany ózgertkisi keledi jáne túrli usynystardy qarastyrýǵa daıyn. Sondyqtan PSJ ony 325 mıllıon eýroǵa baǵalady. Bul soma – fýtbol tarıhyndaǵy rekordtyq soma. Kóptegen klýbtar 21 jastaǵy Kılıan Mbappeniń quny asyra baǵalandy dep sanaıdy.
«Real Madrıd» úzdik oıynshyny alýǵa daıyn ekenin bildirdi. Ataqty klýbtyń basshylyǵy álem chempıony úshin tek 100 mıllıon eýro usynyp otyr.
Ázirge kelissózder júrip jatyr, eger mámile jasalsa, onda 325 mıllıon eýro tarıhtaǵy eń qymbat aýdarym bolmaq.
