Álemdegi eń qymbat dári satylymǵa shyqty
ASTANA. QazAqparat - AQSh-ta álemdegi eń qymbat dári satylymǵa shyǵaryldy. Luxturna dep atalatyn preparattyń baǵasy 850 myń dollarǵa teń, dep habarlaıdy AZERTADJ.
Dárini Fıladelfııada ornalasqan gendik terapııa salasyndaǵy Spark Therapeutics farmatsevtıkalyq kompanııasy shyǵaratyn bolady. 2017 jyldyń jeltoqsanynda AQSh-tyń Ónimder jáne dári-dármekter basqarmasy (FDA) Luxturna preparatynyń kózdiń ishki tor qabyǵynyń sırek kezdesetin tuqym qýalaıtyn aýrýy - Leber amavrozyn emdeıtin qasıetin rastady. Preparat gendik modıfıkatsııalanǵan vırýstyń kómegimen kózdiń ishki tor qabyǵynyń jasýshalaryn durystap, kórý qabiletin qalpyna keltirýge járdemdesedi.
Vırýs 45 mınýtqa sozylatyn ota arqyly tikeleı kóz almasyna engiziledi. Preparatty bir ret qabyldaýdyń ózi jetkilikti.
Atap ótilgendeı, AQSh-ta bul dıagnozben eki myńǵa jýyq adam ómir súredi.
