Álemdegi eń kóp tıtýlǵa ıe fýtbolshy «San -Paýlý» klýbynda oınaýdan bas tartty
NUR-SULTAN. QazAqparat - «San -Paýlý» klýbynyń brazılııalyq qorǵaýshysy Danı Alves jalaqy qaryzyna baılanysty klýbta oınaýdan bas tartty. Bul týraly QazAqparat komandanyń saıtyna silteme jasap habarlaıdy.
Baspasóz máslıhaty kezinde San -Paýlýdyń sporttyq dırektory Karlos Belmonte Alvestiń komanda úshin oınaýǵa nıeti joq ekenin rastady. Bul týraly álemdegi eń kóp tıtýlǵa ıe fýtbolshynyń ókilderi basshylyqqa málim etken. Belmonte klýb basshylary Alvespen kelissóz júrgizýge tyrysqanyn aıtty, biraq ol bas tartqan. «Osyǵan baılanysty Alves endi biz úshin oınamaıdy dep sheshtik», - dep qorytyndylady ol.
O Globo habarlaǵandaı, klýb Alveske 2 mıllıon dollar tóleýi tıis. Fýtbolshy klýbta 2019 jyldan beri oınaıdy.
Alves – ataqty fýtbolshy. Onyń esebinde 46 tıtýl bar. Brazılııalyqtyń mansabyndaǵy eń sátti kezeń - Barselona, Katalonııadaǵy oıyndary. Kógildir anar quramynda ol alty ret Ispanııa chempıonatyn, tórt ret Ispanııa kýbogyn, tórt ret el Sýperkýbogyn, úsh ret Chempıondar lıgasy men ÝEFA Sýperkýbogyn, úsh ret klýbtar arasyndaǵy álem chempıonatyn jeńip aldy.
Alvestiń San -Paýlýǵa oralǵanǵa deıingi sońǵy eýropalyq klýby Parı Sen-Jermen boldy. Parıjdikterdiń quramynda ol alty tıtýldyń ıegeri atandy.
