Álemdegi eń qart velosportshy 109 jasynda ómirden ozdy
PARIJ. QazAqparat - 100 jastan asqan adamdar arasynda velosıped jarysynan rekordshy atanǵan Robert Marchand 109 jasynda senbige qaraǵan túni qaıtys boldy, dep habarlaıdy QazAqparat France-3 telearnasyna silteme jasap.
Frantsýz sportshy Parıjdiń soltústik-shyǵysynda Mıtrı-Maýrı kommýnasynda (Sena-Marna departamenti) qarttar úıinde ómirden ozǵan. Ólimniń sebebi naqtylanbaǵan.
2017 jyly Marchend 105 jastan joǵary jas sanaty boıynsha rekord ornatty. Ol Sent-Kventın-an-Ivelaın velodromynda bir saǵat ishinde 22,5 shaqyrymdy baǵyndyrǵan . 2014 jyly sol velodromda óz nátıjesin jaqsartty - bir saǵat ishinde 26,9 shaqyrym.
Marchand velosıped tebýdi 67 jasynda bastaǵan. Ol kóptegen iri jarystarǵa qatysty, sonyń ishinde Bordo-Parıj, Parıj-Rýbaıks jáne Ardehoı marshrýttary. 1992 jyly ol Parıjden Máskeýge velosıpedpen bardy. Frantsýz eki dúnıejúzilik soǵystan aman ótti, Venesýela men Kanadada ómir súrdi, órt sóndirýshi, fermer, aǵash kesýshi, aıaq kıim jáne sharap satýshy boldy.
Marchand 2018 jyldyń qańtarynda, 106 jasynda zeınetke shyqty. Bir jyldan astam ýaqyt jattyǵýdy jalǵastyrdy jáne 2018 jyldyń sońynda Ardeshtiń Alpilik bóliminde Prıvattan Le Pýzınge deıin (20 shaqyrym) velosıpedpen júrdi.Biraq, sport federatsııalary men qaýymdastyqtary jaýapkershilikten qorqyp, nátıjelerdi sertıfıkattaýdan bas tartty.
