Álemdegi eń kári keıýana 115 jyldyq mereıtoıyn atap ótýde
ASTANA. 6 naýryz. QazAqparat - Álemdegi eń kári keıýana - japondyq Mısao Okava 115 jyldyq mereıtoıyn atap ótýde, dep habarlady «Rossııskaıa gazeti» basylymy.
Ol munsha jasqa kelem dep oılamaǵan. Okava óziniń týǵan kúnin qarttar úıinde atap ótti. 2013 jylǵy qańtarda Gerontology Research Group uıymy Mısao Okavany álemdegi qart áıel dep tanydy. Ol buǵan deıin 115 jyl jasap, qaıtys bolǵan Kúnshuǵylaly eldiń taǵy bir turǵyny Koto Okýbonyń ornyn basty.
Aqpan aıynyń sońynda Okava Gınnestiń rekordtar kitabynyń sertıfıkatyna ıe boldy. Ony alý ústinde ol óziniń uzaq jasaýynyń syrymen bólisti. «Densaýlyqqa kóńil bólý kerek» dedi ol. Shynynda da Okava eshqashan aýyrmaǵan. Ómirinde bir ǵana problema boldy: 102 jasynda aıaǵyn syndyryp alǵan.
Mısao Okava 1898 jyly 5 naýryzda Osakada kımono tigetin sheberdiń otbasynda dúnıege kelgen. Ol osy qalada búkil ǵumyryn ótkizdi. 1919 jyly turmysqa shyqty - úsh balaly boldy, onyń ekeýi - uly men qyzy qazir de tiri. Olardy da uzaq ǵumyr jasaýshylar qataryna qosýǵa bolady: óıtkeni olar da 90 jastan asty. Okavanyń tórt nemeresi jáne alty shóberesi bar.
Japonııada uzaq ómir súrýshiler az emes. Ketango qalasynyń turǵyny Dzıroýemon Kımýra degen aqsaqal da 115 jasqa kelgen. 1997 jyly qaıtys bolǵan frantsýz áıel Janna Lýıza Kalman 122 jasqa kelip, rekord ornatqan bolatyn.
