Álemdegi eń iri ınvestıtsııa Qazaqstanǵa salynady - Baqytjan Saǵyntaev
ASTANA. QazAqparat - Búgin shet memleketterdiń elshilerine Qazaqstannyń ınvestıtsııalyq strategııasyn tanystyrý rásiminde QR Premer-Mınıstri Baqytjan Saǵyntaev munaı-gaz salasyndaǵy eń iri ınvestıtsııa týraly aıtyp berdi, dep xabarlaıdy QazAqparat tilshisi.
"Jaqynda men Amerıka Qurama Shtattarynda bolyp, "Shevronnyń" basshysy Ýotson myrzamen kezdeskenmin. Sonda onyń aıtqany, 25 jyldyń ishinde Qazaqstan qalaı ósti, "Shevron" da solaı damydy. Aldaǵy ýaqytta kompanııa óz óndiristerin keńeıtý aıasynda 39 mlrd. dollar kólemindegi ınvestıtsııany salýdy josparlap otyr. Bul álem boıynsha munaı-gaz salasyndaǵy eń iri ınvestıtsııa bolyp sanalady. Ýotson myrza óz kompanııasynyń sheteldegi Qazaqstan elshisi qusap bárine osy eldegi ınvestorlar úshin jasalatyn jaǵdaılar jaıynda aıtyp júretinin jetkizdi. 25 jyldyń ishinde qanshama aqsha taptyq, endi sony basqa memleketke emes, Qazaqstanǵa salamyz dep otyr. Sondyqtan biz eski ınvestorlardy esh ýaqytta umytpaımyz. Óıtkeni olarǵa qarap, jańa ınvestorlar keledi", - dedi Úkimet basshysy.
Aıta keteıik, Premer-Mınıstr Baqytjan Saǵyntaev Qazaqstanǵa tartylǵan ınvestorlardyń aımaqtarda birqatar kedergilerge tap bolatynyna alańdap otyr. Sonyń biri - jergilikti bıliktiń til bilmeýi.
Al QR Investıtsııalar jáne damý mınıstri Jeńis Qasymbektiń aıtýynsha, maýsym aıynyń aıaǵyna deıin ınvestıtsııalardy tartýdyń ulttyq strategııasy daıarlanady. Sonyń aıasynda shetel ınvestıtsııasyn tartyp qana qoımaı, ony ustap qalýǵa da basymdyq beriledi.
