Álemdegi eń iri áýejaı Ystambulda salynatyn boldy
ASTANA. 25 qańtar. QazAqparat - Túrkııanyń kólik mınıstri Bınáli Iyldyrym sársenbi kúni Ystambulda álemdegi eń iri áýejaı salynatynyn málim etti. Bul jaıynda Foxbusiness.com habar taratty.
Jańa áýejaı aýdany 77 mln sharshy metr bolmaq. Áýejaı Qara teńizdiń jaǵalaýyna, qalanyń eýropalyq bóliginde salynatyn boldy. Áýejaıdyń jylyna 150 mln-ǵa deıin jolaýshy qabyldaıtyn áleýeti bolmaq.
muslim.kz saıtynyń jazýynsha, Túrkııadaǵy qazirgi kúni eń úlken sanalatyn Ystambuldaǵy Atatúrik atyndaǵy halyqaralyq áýejaı jylyna 45 mln jolaýshyny qabyldaıdy. Іriligi jaǵynan odan keıingi orynda turǵan áýejaı da Ystambul shaharynda ornalasqan. Jylyna 15 mln adamǵa deıin qyzmet kórsetedi. Al álemdegi eń iri áýejaı Atlantada. Jylyna 90 mln-daı jolaýshyny qarsy alyp, shyǵaryp salady.
Sońǵy on jyldyń ishinde Túrkııada áýe reısteriniń aıtarlyqtaı artqany baıqalady. «Týrısterdiń sany Ystambul turǵyndarynyń sanynan tórt esege kóbeıdi», - dedi kólik mınıstri. Onyń aıtýynsha, Atatúrik áýejaıyn keńeıtýge qatań shekteý qoıylǵan. Sol sebepti, úkimet jańa áýejaı salýǵa sheshim qabyldady.
Mınıstr áýejaı qurylysyna qatysty tenderdiń jýyrda jarııalanatynyn málimdedi. Sheneýniktiń esebinshe, jobanyń quny 5,6 mlrd dollar bolýy múmkin.
