Álemdegi eń iri áýejaı Ystambulda salynady
ASTANA. 24 qańtar. QazAqparat - Túrkııanyń kólik mınıstri Bınalı Iyldyrym sársenbi kúni málim etkendeı, Ystambulda álemdegi eń iri áýejaı salynatyn bolady, dep habarlady Foxbusiness.com.
Jańa áýe turaǵy Qara teńiz jaǵalaýynda qalanyń eýropalyq bóliginde 77 mln. sharshy metr aýmaqta ornalasatyn bolady jáne jylyna 150 mln. jolaýshyǵa deıin qabyldaı alatyn bolady.
Sheneýniktiń boljamynsha, jobanyń quny shamamen 5,6 mlrd. dollardy quraıdy. Nysannyń qurylysyn tórt kezeńde aıaqtaý josparlanýda.
Aıta keteıik, qazirgi ýaqytta Túrkııada eń iri áýejaı - Ystambulda ornalasqan Atatúrk atyndaǵy halyqaralyq áýejaı. Onyń jyl saıynǵy jolaýshylar aınalymy 45 mln. adamdy quraıdy. Kólemi boıynsha eldegi ekinshi áýejaı da Ystambulda boı kótergen. Ol jylyna 15 mln. jolaýshyǵa deıin qabyldaıdy.
Qulaqqaǵys bolsyn, álemdegi eń iri áýejaı Atlantada oryn tepken, ol jyl saıyn shamamen 90 mln. adamdy qabyldaı alady eken.
