Álemdegi eń baıyrǵy gazet baspa túrindegi nusqasyn jabady
ASTANA. 27 qyrkúıek. QazAqparat - Osy kezge deıin baspa túrinde shyǵyp kelgen Londondyq álemdegi eń baıyrǵy gazet Lloyd's List 20 jeltoqsannan bastap qaǵaz nusqasyn shyǵarýdy toqtatady. Bul týraly basylymnyń saıtynda málim etildi, dep habarlady Lenta.rý.
Lloyd's List redaktsııasynyń habarlaýynsha, zertteý nátıjesinde gazettiń basylym túrindegi nusqasyn eki paıyzdan da az oqyrman oqıdy eken. Sońǵy jyldary álemdegi teńiz saýdasyna mamandanyp otyrǵan Lloyd's List gazeti sandyq jáne uıaly platformalarǵa qarjy saldy. Baspa túrinde shyǵarýdan bas tartý basshylyqqa osy baǵyttaǵy oqyrmandar saýalyn jaqsyraq qanaǵattandyrýǵa múmkindik bermek.
«Sandyq platformalar ártúrli jáne tıimdi aqparat almasýǵa molyraq múmkindik týǵyzady», - delingen redaktsııanyń málimdemesinde. Eger XVIII ǵasyrda gazet paraqtary dámhanalardyń qabyrǵalaryna japsyrylǵan bolsa, endi oqyrmandar osy dámhanalarda otyryp-aq ózderiniń planshetteri men smartfondary arqyly basylymdy oqı alady».
«Bizdiń gazetimizdiń úsh júz jyldyq tarıhy bar, al teńiz saýdasy - konservatıvtik sala, sondyqtan da biz táýekelge baryp otyrǵanymyzdy túsinemiz jáne onlaın-nusqaǵa kóshýge asa qaýiptenbeımiz», - dedi Lloyd's List gazetiniń bas redaktory Rıchard Mıd.
Lloyd's List gazeti Londonda 1734 jyldan beri shyǵyp keledi. Onyń shyǵarýshysy brıtandyq Informa kompanııasy.
