Álemdegi eń baı top-model belgili boldy

Kóptegen elderdiń jýrnalısteri júrgizgen reıtınginiń birinshi ornyn ol 350 mln. dollar jyldyq tabysynyń arqasynda aldy.

Al buǵan deıin osy orynnan túspeı kelgen Jızel Býndhen 250 mln. dollar tabyspen ekinshi orynǵa yǵysty. Ony yǵystyrǵan Ketı  13 jyl boıy Sports Illustrated jýrnalymen qoıan-qoltyq jumys jasap, keıinnen óziniń  Kathy Ireland Worldwide dep atalatyn kommertsııalyq ımperııasyn quryp alǵan edi. Ol túrli salalar boıynsha 15 myńǵa jýyq taýar túrlerin shyǵarýmen aınalysady.

Bul turǵydan kelgende, Jızel Býndhen azdap osaldaý: onyń jeke bıznes-jetistigi - 40 zattan turatyn ish kıim úlgilerin aınalymǵa shyǵarýy boldy. Degenmen, bul qadamy onyń óz baılyǵyn 40 paıyzǵa deıin kóbeıtýge kómekteskenin atap ótken jón. 

Podıým padıshalarynyń úshtigin Sındı Kroýford tuıyqtaıdy. Onyń baılyǵy jylyna 100 mln. dollar. Ótken ǵasyrdyń 90-jyldarynda top jarǵan top-model qazir jıhaz dızaınymen aınalysyp, fıtnesten beınesabaqtar berip, «nanyn aıyryp» júrgen kórinedi.  

Tórtinshi orynda - Taıra Benks (90 mln. dollar). Taıra podıýmda «taırańdap» qana qoımaı, ózin tanymal telejúrgizýshi, daryndy jazýshy retinde de dáleldeı alǵan top-model bolyp tabylady. Besinshi oryn - Krıstı Brınklı (80 mln). Bul amerıkandyq top-model Cover Girl atty amerıkalyq kompanııamen shart jasaý arqyly ǵana baıymaı, jyljymaıtyn múlikke qarjy salý arqyly da qyrýar paıda tapqan kórinedi.

Haıdı Klým 70 mln. dollarmen altynshy orynǵa taban tiredi.  Onyń osynsha aqsha jınaýyna Victoria's Secret-pen áriptestik kelisimsharty, túrli teleshoýlarǵa túsýi, iri kıim brendterimen jumys jasaýy jáne basqa da bıznes-jobalardyń paıdasy tıdi. Jetinshi orynda  - 50 mln. dollar tabatyn Keıt Moss kele jatyr. Onyń aqshasy Rimmel kosmetıka brendimen jumystan, sondaı-aq, ózi ashqan erin boıaǵysh pen opa-dalap saýdasynan túsip otyr.

Odan sál qalyp qoıǵan Naomı Kempbell 48 mln. dollarmen segizinshi oryndy qanaǵat tutty. Bul Qara Pantera osynshama aqshany podıýmǵa shyǵyp jáne jarnamaǵa túsip-aq taýyp aldy. Endi sonyń qyzyǵyn kórip, dańqqa bólengen kúıi tynysh qana ómir súrýde. Toǵyzynshy orynda  - avstralııalyq top-model El Makferson (45 mln dollar). Sán áleminen ketken soń, ol ózi jasap shyǵarǵan Elle Macpherson Intimates markaly kóılek saýdasynan kóp-kórim paıda kórip otyr.

Úzdik ondyqty jylyna 40 mln. dollar paıda tabatyn Klaýdııa Shıffer támamdaıdy. Onyń da bul jetistigi sán álemindegi karerasyna jáne óziniń kıim júıesine tikeleı baılanysty.

Top-15 tobyna sondaı-aq, Mılla Iovovıch (36 mln), Adrıana Lıma (35 mln), Krıstı Tarlıngton (18 mln), Lında Evangelısta (18 mln) jáne Daýttsen Krýster (9 mln) kiredi.