Álemdegi ekinshi iri kovorkıng Almatyda ashylady
ALMATY. QazAqparat - Almatyda TMD-daǵy eń iri Kovorkıng ortalyq ashylady. Bul ortalyq kólemi boıynsha álemdegi ekinshi nysan bolyp tabylady.
Jalpy aýdany 13 000 sharshy metr bolatyn ortalyqta bir mezette 1000 adam otyratyn bolady.
Ofıstik keńistikte 64 kabınet, 4 konferents-zal, kórme aımaǵy jasaqtalady. Sonymen qatar, 6 tamaqtaný orny, 200 kólikke arnalǵan jerasty jáne jerústi turaǵy salynyp jatyr.
Bul jobaǵa eki qazaqstandyq kompanııa 2 mln dollardan 4 mln dollar kóleminde ınvestıtsııa salǵan.
«Ál-Farabı kóshesindegi bankterge qarsy terrıtorııaǵa ne salý kerektigin oılandyq. Saýda úıin salý qajettigi bolmady. Oılana kele kovorkıng ortalyqqa toqtadyq. Sebebi, bul bıznes salasyndaǵy jasampaz adamdarǵa qajet. Qazir qurylys aıaqtalyp qaldy. Bıyl qazanda ortalyqty ashamyz», - dedi Estate Management Company kompanııasynyń basqarma tóraǵasynyń orynbasary Asqar Bilisbekov.
Aıta ketý kerek, álemdegi eń iri kovorkıng ortalyq Londonda ornalasqan. Onyń kólemi 15 000 sharshy metr.
Búgin Medeý aýdany boıynsha ınvestıtsııalyq forým barysynda arnaıy jobalardan basqa aýdannyń ınvestıtsııalyq múmkindikteri de talqylandy.
Aýdan ákimi Erjan Jylqybaevtyń aıtýynsha, búgingi tańda Medeý aýdanynda qurylys salasynda 53 mlrd teńge ınvestıtsııa tartyldy.
«Almaty boıynsha salyq túsimderiniń 30 paıyzy, ıaǵnı 528 mlrd teńge Medeý aýdanynyń úlesinde. Qaladaǵy barlyq qarjylyq operatsııalardyń 70 paıyzy Medeý aýdanynda júzege asady. 8 aıda taýar aınalymy 208 mlrd teńgege jetti. Bıznestiń jol kartasy-2020 boıynsha quny 4,5 mlrd teńge bolatyn 9 joba júzege asyp jatyr», - dedi E.Jylqybaev.
Jıyn barysynda ınvestorlar men bıznesmenderge aýdannyń jyljymaıtyn múlik salasy boıynsha ınvestıtsııalyq áleýeti aıtyldy.
Almaty qalasynyń bıligi qaladaǵy ınvestıtsııayq klımatty ońtaılandyrý jolynda jyl saıyn ınvestıtsııalyq forým ótkizip turady.
Otandyq ınvestorlardy qoldaýda Qazaqstanda birqatar baǵdarlama qabyldanǵan. Olardyń biri «Bıznestiń jol kartasy-2020». Bul baǵdarlama boıynsha ınvestıtsııalyq jobalarǵa memleket nesıelerge demeýqarjy, kepildendirý beredi.
Sondaı-aq, Almatynyń 2020 jylǵa deıingi damý baǵdarlamasyna sáıkes qalanyń ınvestıtsııalyq tartymdylyǵyn arttyrý, sondaı-aq qaladaǵy qarajatty kóp qajet etetin jáne uzaq merzimdi jobalarǵa strategııalyq seriktesterdi tartý boıynsha birqatar is-sharalar iske asyrylýda.
Atap aıtqanda ákimdik mýnıtsıpaldyq sektorǵa uzaq merzimdi ınvestıtsııalardy tartý úshin turaqty negizde halyqaralyq qarjy ınstıtýttarymen (Eýropa damý jáne qaıta qurý banki, Azııa damý banki, Dúnıejúzilik bank jáne t.b.) yntymaqtastyq jasasady, ınvestıtsııalyq jobalar, halyqaralyq dıplomatııalyq jáne bıznes delegatsııalarymen kezdesýler tizbesi jasaldy.
