Álemdegi áskerı qaqtyǵystardyń qorytyndysyn taldap otyramyz - Qarýly Kúshter Bas shtaby

ASTANA. QazAqparat – Qazaqstan Qarýly Kúshteri Bas shtaby Jedel josparlaý departamenti bastyǵynyń orynbasary Dáýren Abdýllın ortalyq kommýnıkatsııalar qyzmetinde ótken brıfıngte elimizdiń Qarýly Kúshteriniń áleýeti týraly pikir bildirdi, dep habarlaıdy QazAqparat tilshisi.

«Búgingi tańda álemde jáne óńirlerdegi jaǵdaılarǵa baılanysty Qarýly Kúshterdiń atqaratyn róliniń sózsiz mańyzy bar.

Qazirgi ishki jáne syrtqy qaýipter elimizdiń áskerı qaýipsizdigine erekshe kóńil aýdarýdy qajet etetini anyq. Osyǵan oraı azamattarymyz «Eger de el basyna kún týsa, Qarýly Kúshterimizdiń qandaı múmkinshiligi bar?» degen saýaldy jıi qoıatyny ras.

Kúmándardy biraz seıiltý úshin búgingi qarastyratyn másele, bul áskerlerdiń daıarlyǵyn uıymdastyrýdaǵy jańa bastamalar jáne Qarýly Kúshterde ótken oqý-jattyǵýlar týraly bolmaq.

Qazirgi tańda álemdegi bolyp jatqan áskerı qaqtyǵystardaǵy jedel jaǵdaılardy muqııat qadaǵalap, qorytyndysyn taldap otyramyz», - dedi Bas shtab ókili.

Sondaı-aq, ol keıingi jyldary zamanaýı áskerı is-qımyldardy júrgizýde birtalaı ózgerister bolyp jatqanyn eske saldy.

«Áskerı is-qımyldyń barysyna jáne aıaqtalýyna qashyqtyqta oq atýmen zaqymdaıtyn joǵary dáldikti quraldardyń, ushqyshsyz avıatsııanyń, qalyqtaýysh oq-dárilerdiń bar bolýy, Arnaıy operatsııalar kúshterin jáne jeke áskerı kompanııalardy jáne aqparattyq keńistikte qarsy kúresý quraldaryn qoldaný yqpal etedi.

Tankige qarsy jáne tasymaldaýshy zenıttik-zymyrandyq keshendermen jabdyqtalǵan aýmaqtyq qorǵanys kúshterin qoldaný oıdaǵydaı nátıjeler kórsetýde.

Artıllerııanyń (ásirese batareıaǵa qarsy kúres), tanki áskerleriniń, ınjenerlik qamtamasyz etýdiń ózektiligi tómendemeı otyr. Barlaýdyń, búrkenishtiń jáne logıstıka róliniń mańyzdylyǵyna kóz jetip otyr», - dedi Dáýren Abdýllın.