Álemdegi árbir besinshi adam allergııadan zardap shegedi
NUR-SULTAN. QazAqparat - Parlament Májilisiniń jalpy otyrysynda depýtat Maıra Aısına elimizde allergııa shaqyrmaıtyn taza ónimderdi shyǵarýǵa qoldaý kórsetý tetikterin kúsheıtýdi surady. Osy oraıda ol QR Úkimet basshysynyń orynbasary Jeńis Qasymbektiń atyna depýtattyq saýal joldady, dep habarlaıdy QazAqparat tilshisi.
«Eger dárigerler HH ǵasyrdy júrek-qan tamyry aýrýlarynyń ǵasyry dep ataǵan bolsa, Dúnıejúzilik densaýlyq saqtaý uıymynyń boljamy boıynsha, qazir allergııa ǵasyry bolyp tabylady. Sebebi statıstıka boıynsha búginde jer betindegi árbir besinshi adam aýrýdyń osy túrinen zardap shegýde.
Osyndaı jaǵdaıda allergııa shaqyrmaıtyn óte sırek ónim - ol eshki súti. Sondyqtan qazirgi tańda álemde ónerkásiptik eshki sharýashylyǵyn damytý úrdisi baıqalýda. Eshki súti men ony óńdeý ónimderiniń keń taralýy onyń bala taǵamdaryn almastyrǵysh retinde, tipti ana sútiniń ornyna paıdalanylýyna, sondaı-aq óndiris ónimdiligi men ekonomıkalyq rentabeldiliginiń joǵary bolýyna da baılanysty. Qazaqstan naryǵynda bul salany damytýǵa qolaıly jaǵdaı bar», - dedi depýtat Maıra Aısına.
Onyń sózine qaraǵanda, eshki sharýashylyǵy memlekettik jáne salalyq baǵdarlamalar ázirleý kezinde negizsiz nazardan tys qalyp júr. Sýbsıdııa berý turǵysynda baıqalǵan oń úrdis sońǵy kezde jaǵymdy nátıje kórsetpedi. Búginde Atyraý, Túrkistan jáne Aqmola oblystarynda ǵana bar-joǵy 3 eshki ósirý kásiporyny bar.
«Álemdik tájirıbeni eskere otyryp, mal (eshki) satyp alýǵa bólinetin sýbsıdııanyń mólsherin qaıta qaraýdy usynamyz. Aýyl sharýashylyǵy salasyna dotatsııalar men granttar bólý kezinde asyl tuqymdy eshki ósirý sharýashylyqtaryn, eshki súti men odan jasalatyn ónim óndirýshilerdi, onyń ishinde irimshik qaınatý óndirisin qoldaýdy suraımyz», - dedi M. Aısına.
