Álemdegi ahýal: koronavırýs juqtyrýdyń táýliktik rekordy tirkeldi
JENEVA. QazAqparat – Dúnıejúzilik densaýlyq saqtaý uıymy ótken táýlikte koronavırýs juqtyrý jaǵdaılarynyń eń kóp sanyn tirkedi, dep habarlaıdy QazAqparat uıymnyń resmı saıtyna silteme jasap.
Bir táýlikte indetke shaldyǵýshylar sany 308 myńǵa artty. Bul – pandemııa kezeńindegi eń kóp táýliktik ósim kórsetkishi. Álemde aýrý juqtyrý jaǵdaılarynyń jalpy sany 28,6 mıllıonǵa jetti. Koronavırýs ınfektsııasynan kóz jumǵandar sany 5,6 myńǵa artyp, 917,417-ge jetti.
AQSh indetke shaldyqqandar jáne vırýstan qaıtys bolǵandar sany boıynsha álemde kósh bastap tur. Munda 6,3 mıllıon adam koronavırýs juqtyrsa, 191 myńnan astam adam kóz jumǵan.
Aýrý juqtyrǵandar sany boıynsha ekinshi orynda turǵan Úndistanda 4,6 mıllıonnan astam adam indetke shaldyqqan. Munda koronavırýstan 78,5 myń adam qaıtys bolǵan.
Brazılııa rastalǵan jaǵdaılar sany boıynsha úshinshi orynda. Munda aýrý juqtyrýdyń 4,2 mıllıon jaǵdaıy tirkelgen. Brazılııada 130 myńnan astam adam koronavırýstan kóz jumǵan.
