Álemdegi 3 mlrd adam ashqursaq júredi - BUU

ASTANA. QazAqparat – Álem boıynsha 3 mıllıardtan astam adam ashqursaq júredi. Mundaı qorytyndyny Azyq-túlik jáne aýyl sharýashylyǵy uıymynyń (FAO) sarapshylary jasady, dep habarlaıdy QazAqparat BUU jańalyqtar ortalyǵyna silteme jasap.

Durys tamaqtaný, salaýatty dıeta aǵzaǵa jetkilikti kalorııany qamtamasyz etedi. Azyq-túlik uıymynyń qunarly azyq-túlik sebeti táýligine 2330 kkal jáne arzan, jergilikti ónimderden turatyn alty sanattaǵy azyq-túlikterge negizdelgen: 1) dándi daqyldar, makaron ónimderi jáne kartop, 2) kókónister, 3) jemister, 4) janýarlar ónimderi, 5) burshaq, jańǵaqtar, 6) ártúrli maılar.

Azııada «azyq – túlik kedeıligi» sheginen tómen adamdar sany 78 mıllıonǵa ósti. Dál sol aımaqta qunarly azyq-túlik sebetiniń quny bir jylda 4 paıyzǵa qymbattady.

FAO keltirgen málimet boıynsha, durys tamaqtaný Latyn Amerıkasy men Karıb teńizi aımaǵynda eń qymbat – kúnine 3,89 dollar. Odan keıin Azııa - kúnine 3,72 dollar, Afrıka-kúnine 3,46 dollar, Soltústik Amerıka men Eýropa – kúnine 3,19 dollar, Okeanııa – 3,07 dollar. Afrıkanyń 12 elinde halyqtyń 90 paıyzdan astamy tolyq tamaqtanýǵa múmkindigi joq.

Postkeńestik elderdegi durys tamaqtaný quny Ázerbaıjanda kúnine 2,53 dollar, Armenııada – 3,25 dollar, Belarýstta– 3,31 dollar, Qazaqstanda – 2,66 dollar, Qyrǵyzstanda – 3,18 dollar, Moldovada – 2,81 dollar, Reseıde – 3,42 dollar, Tájikstanda – 3,48 dollardy quraıdy.