Álemdegi 2 mıllıard musylman Máýlit merekesin toılaýda - Bas múftı
ALMATY. 5 naýryz. QazAqparat /Erlik Erjanuly/ - Máýlit merekesi Qazaqstanda búkilhalyqtyq dárejege kóterildi. Qazaqstan musylmandary Dinı basqarmasynyń tóraǵasy Bas múftı sheıh Ábsattar qajy Derbisáli búgin Almatydaǵy Balýan Sholaq atyndaǵy sport saraıyndaǵy Máýlit merekesine arnalǵan alqaly jıynda osylaı aıtty.
«Qazir álemde 6 mıllıard halyq bar. Onyń 2 mıllıardy musylmandar. Máýlit merekesi musylman memleketterinde ǵana emes, ózge elderde de atap ótilip jatyr. Keıbir baýyrlarmyz "Máýlit degen ne?" dep suraıdy. Ol paıǵambarymyz Muhammed s.ǵ.s-nyń týǵan kúni. Máýlit arab tilinde "týylǵan kún" degen maǵyna beredi. Bul Alla taǵalanyń eń súıikti pendesi, Adam atadan bastalǵan paıǵambarlarymyzdyń sońǵysy hazireti Muhammedtiń dúnıege kelgen kúnine ataý etip qoıylǵan sóz», - deıdi Ábsattar qajy.
Bas múftıdiń aıtýynsha, paıǵambardyń dúnıege kelgen kúni bıyl elimizde 14 aqpanmen tuspa-tus kelip otyr. Sol sebepti 14 naýryzǵa deıin musylmandarmyz týǵan kúndi atap ótetin bolady. Jalpy Máýlit merekesin atap ótý alǵash ret 909 jyly Mysyrda bastaldy. Al ol 1207 jyldan bastap resmı túrde atap ótilip, bul mereke XVІ-XVІІ-ǵasyrlarda Osman ımperııasynyń resmı meıramy bolyp bekitilgen.
«Máýlit merekesi bizdiń elimizde de biraz ǵasyrdan beri toılanyp kele jatyr. Birqatar aqyndar men din qaıratkerleriniń qazaq tilinde jazylǵan Máýlit jyrlary da bar. Qazir Máýlit Qazaqstan musylmandary Dinı basqarmasynyń bastaýymen búkil elimizde toılanýda. 2000 jyldan beri bul mereke belsendi túrde ótkizilýde. Búkilhalyqtyq dárejege kóterildi. Alǵashqy kezde bul shara Almatyda Qazaqtyń Muhtar Áýezov atyndaǵy memlekettik akademııalyq drama teatry men Qazaqtyń Ǵabıt Músirepov atyndaǵy memlekettik balalar men jasósprimder teatrynda ótkizilip kelgen edi. Ol 2007 jyldan bastap Respýblıka saraıynda toılandy. Endi ol elimizdiń eń úlken saraıynda óz jalǵasyn taýyp otyr», - deıdi sheıh Ábsattar qajy Derbisáli.
