Álemdegi 11 myń ǵalym klımattyń ózgerip jatqanyn aıtyp dabyl qaqty
NUR-SULTAN. QazAqparat - Álemdegi 11 myń ǵalym klımattyń ózgerýi týraly saıasatkerlerge baǵyttalǵan úndeý hat jarııalady, dep habarlaıdy QazAqparat CNN-ge silteme jasap.
«Búkil álemniń túkpir túkpirinen shyqqan 11 myń ǵalym adamzat óziniń qazirgi jolyn ózgertpese, klımattyń ózgerýi qandaı azap shekkizýi múmkin ekeni týraly hat jazdy. Olar ǵalym retinde bardy bar dep aıtýǵa moraldyq quqyqtary bar ekenin málimdedi», delingen materıalda.
Baıandama avtorlarynyń biri Fıbı Barnard bul qujat eń aldymen saıasatkerlerge baǵyttalǵanyn aıtqan.
«Keler urpaq saıasatkerler týraly jaman oıda bolady, sebebi olar klımattyń ózgerýi órkenıetke tóngen qaýip ekenine mán bermedi», - deıdi ol.
Aıta ketý kerek, ǵalymdar buǵan deıin de birigip pikir bildirgen edi. 2017 jyly 184 memleketten jınalǵan 16 myń ǵalym «adamdar men álem qaqtyǵys aldynda turǵanyn» eskertip úndeý hat jazǵan edi. Al bıylǵy hat BioScience ǵylymı jýrnalynda jarııalandy. 150-den astam memleket ǵalymdarynyń aıtýynsha, klımattyq daǵdarys «baı ómir súrýge umtylýǵa» baılanysty.
«Klımat belsendisi Greta Týnbergtiń sózderin qaıtalaǵan ǵalymdar tıisti sharalar qabyldamaıtyn saıasatkerlerdi synady. Sonymen qatar olar bul máseleni sheshýge kómektese alatyn úsh negizgi faktordy aıtty. Olar: qazba otynnan bas tartý, klımatty lastaıtyn qaldyqtardy azaıtý jáne etti az tutyný, kómirteksiz ekonomıka qurý, qyzdardy oqytý men otbasyn qurý qyzmetine ınvestıtsııa salý arqyly halyq sanyn arttyrý», - dep jazady avtor.
