Álemdegi jumys oryndarynyń shamamen 25 paıyzy JI yqpalyna ushyraýy múmkin

ASTANA. KAZINFORM —  Halyqaralyq eńbek uıymy (HEU) men Polshanyń Ulttyq zertteý ınstıtýtynyń (NASK) jańa birlesken zertteýine sáıkes, jasandy ıntellektini qoldanýdyń eń yqtımal nátıjesi — adamdy tolyqtaı kompıýtermen almastyrý emes, jumys sıpatynyń ózgerýi bolady, dep habarlaıdy BUU jańalyqtary. 

— Biz teorııa sheńberinen shyǵyp, naqty jumys oryndary týraly derekterge negizdelgen qural jasadyq. Adam tájirıbesin, saraptamalyq taldaýdy jáne generatıvti jasandy ıntellekt modelderin biriktire otyryp, biz elderge táýekelderdi baǵalap, bolyp jatqan ózgeristerge tıimdi áreket etýge kómektesetin ádisti jasadyq, — dedi Halyqaralyq eńbek uıymynyń aǵa ǵylymı qyzmetkeri jáne zertteýdiń jetekshi avtory Pavel Gmyrek.

Esepke sáıkes, mamandyqtardy generatıvti jasandy ıntellektiniń yqpal etý deńgeıine qaraı toptastyrýǵa bolady.

Jasandy ıntellekt eńbek naryǵynda áıelder men erlerge ártúrli áser etýi múmkin 

Álemdegi jumys oryndarynyń shamamen 25 paıyzy JI yqpalyna ushyraýy múmkin, al damyǵan elderde bul kórsetkish 34 paıyzǵa jetedi. Sonymen qatar, áıelderdiń jumysyna JI áser etý yqtımaldyǵy áldeqaıda joǵary.

Esepte aıtylǵandaı, damyǵan elderde avtomattandyrý qaýpi eń joǵary jumys oryndary áıelderdiń jumyspen qamtylýynyń 9,6 paıyzyn quraıdy, al erler arasynda bul kórsetkish nebári 3,5 paıyz.

Qaı mamandyqtarǵa eń kóp qaýip tónedi

Esepke sáıkes, keńse jumystary jasandy ıntellektiniń eń kóp yqpalyna ushyraıdy, óıtkeni generatıvti JI kóptegen tapsyrmany avtomattandyra alady. Degenmen, JI-diń keńeıip kele jatqan múmkindikteri BAQ, baǵdarlamalyq qamtamasyz etý jáne qarjy salasyndaǵy birqatar tanymdyq mamandyqtarǵa da áser etedi.

Sonymen qatar, sarapshylar kóptegen tapsyrmaǵa áli de adam qatysýy qajet ekenin aıtyp, tolyǵymen avtomattandyrylatyn mamandyqtar sany shekteýli ekenin atap ótti.

Inklıýzıvti strategııalar qurýǵa shaqyrý

Sarapshylar úkimetterdi, kásipodaqtardy jáne basqa uıymdardy áleýmettik dıalogqa qatysýǵa jáne ónimdilikti arttyratyn, jumys sapasyn jaqsartatyn ári jumys oryndaryn saqtap qalýǵa múmkindik beretin ınklıýzıvti strategııalar ázirleýge shaqyrady.

— Jasandy ıntellekt tóńiregindegi ý-shýdyń arasynda adasyp ketý ońaı. Bizge naqtylyq pen kontekst qajet, — dedi Halyqaralyq eńbek uıymynyń aǵa ekonomısi Janın Berg. 

Ol uıym elderge eńbek naryǵyn ádiletti tsıfrlyq bolashaqqa daıyndaýǵa qoldaý kórsetetinin atap ótti.

Aıta ketelik sarbazdardyń psıhıkalyq jaǵdaıyn jasandy ıntellektiniń kómegimen anyqtaıtynyn jazǵan edik.