Álemdegi kóptegen túıtkilge qatysty Qazaqstan men Bolgarııa ustanymy uqsas - Prezıdent
ASTANA. KAZINFORM – Álemdegi kóptegen túıtkilge qatysty Qazaqstan men Bolgarııa ustanymy uqsas. Bul týraly Aqordada Bolgarııa Prezıdenti Rýmen Radevpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
- Prezıdent Rýmen Radev myrza ekeýimiz aımaqtyq jáne jahandyq kún tártibindegi ózekti máselelerdi de talqyladyq. Álemdegi kóptegen túıtkilge qatysty eki eldiń ustanymy uqsas. Biz bir-birimizdiń bastamalarymyzdy únemi qoldap kelemiz. Kópjaqty qurylymdar aıasyndaǵy yqpaldastyǵymyz oıdaǵydaı damyp keledi. Men Almatyda BUU-nyń Ortalyq Azııa men Aýǵanstandy damytý ortalyǵyn qurý týraly bastamany qoldaǵany úshin bolgar tarapyna, Prezıdent myrzaǵa zor alǵys aıttym, - dedi Qasym-Jomart Toqaev.
Memleket basshysy álemdegi kúreli geosaıası ahýal men túrli qaqtyǵystar elderimizdi alańdatyp otyrǵanyn basa aıtty.
- Qos tarap ta barlyq túıtkildi beıbit jáne saıası dıplomatııalyq jolmen sheshý qajet dep sanaıdy. Biz kópjaqty dıplomatııany odan ary damytýǵa erekshe mán beremiz. Bolashaqta da halyqaralyq deńgeıde kúsh-jigerimizdi biriktirip, úılesimdi jumys isteýge, beıbitshilik pen turaqtylyqty nyǵaıtý isine belsene qatysýǵa kelistik. Bul sapar Qazaqstan men Bolgarııanyń qarym-qatynasyn tyń qarqynmen damytýǵa jol ashady dep senemin. Biz bir-birimizge ózara qoldaý kórsetip, ortaq maqsattarǵa birge jetemiz. Men buǵan kámil senemin, - dedi Prezıdent.
Buǵan deıin Memleket basshysy Qasym-Jomart Toqaev Aqordada elimizge resmı saparmen kelgen Bolgarııa Prezıdenti Rýmen Radevti qarsy alǵanyn jazǵan edik.
Birlesken málimdeme barysynda Prezıdent Transkaspıı halyqaralyq kólik dálizine Bolgarııanyń Býrgas jáne Varna teńiz porttaryn qosý máselesi qarastyrylatynyn aıtty.