Álemdegi geosaıası shıelenis jahandyq saýda men ekonomıkalyq turaqtylyqqa qater tóndirip tur - Prezıdent
ASTANA. KAZINFORM – Memleket basshysy «Ortalyq Azııa – Koreıa Respýblıkasy» bıznes-sammıtinde sóz sóıledi, dep habarlaıdy Aqorda.
Qasym-Jomart Toqaev «Ortalyq Azııa – Koreıa Respýblıkasy» birinshi bıznes-sammıtine qatysýshylarǵa iltıpat bildirip, Qazaqstan Koreıa Respýblıkasynyń Ortalyq Azııa elderimen ekonomıkalyq baılanysty jan-jaqty damytý nıetin joǵary baǵalaıtynyn atap ótti.
– Álemdegi geosaıası shıelenis jahandyq saýda men ekonomıkalyq turaqtylyqqa buryn-sońdy bolmaǵan qater tóndirip tur. Bul jaǵdaıda memleketter arasyndaǵy ózara túsinistik pen senim tabysty ári uzaqmerzimdi bıznes-seriktestiktiń mańyzdy faktorlarynyń birine aınalady. Onsyz elderimiz arasyndaǵy san salaly qarym-qatynas nátıjeli damýy múmkin emes. Bul Qazaqstanǵa da qatysty. Biz Koreıa Respýblıkasymen yqpaldastyqty ilgeriletýge beıilmiz. Memleketińizge, onyń baıyrǵy dástúrleri men mádenıetine zor qurmetpen qaraımyz. Ortalyq Azııada tabıǵı resýrstardyń mol qory bar. Jańa ǵana Koreıa Respýblıkasynyń Prezıdenti Lı Chje Meń myrza aıtyp ótkendeı, aımaqta tutyný naryǵy ulǵaıyp, halyq sany artyp keledi, – dedi Memleket basshysy.
Qazaqstan Prezıdenti ótken jyly aımaqtaǵy elderdiń ishki jalpy óniminiń jıyntyq kólemi 550 mıllıard dollarlyq mejege jýyqtap, ósim 6 paıyzdan asqanyn jetkizdi. Bul – álemdegi ortasha kórsetkishten eki esedeı joǵary.
– Saýda-ekonomıkalyq baılanystyń nyǵaıýy jáne kólik salasyndaǵy yqpaldastyqtyń keńeıýi aımaqty ınvestıtsııalyq turǵydan tartymdy ete túsedi. Osy artyqshylyqtardy Koreıanyń óndiristik, tehnologııalyq jáne qarjylyq múmkindikterimen ushtastyrý ózara tıimdi ári perspektıvti yntymaqtastyqqa jol ashady. «Ortaq maqsattarǵa qol jetkizý jolynda resýrs biriktirý» formýlasyna saı kúsh jumyldyrsaq, san qyrly seriktestigimizdi múldem jańa ári sapaly deńgeıge shyǵara alamyz dep oılaımyn. Qazaqstan osy mańyzdy mindetti eńserý úshin óz áleýetin tolyq paıdalanýǵa daıyn, – dedi Memleket basshysy.
Aıta keteıik, Prezıdent Ortalyq Azııa men Koreıa jastaryna arnalǵan jańa baǵdarlama qabyldaýdy usyndy.
