Álemdegi eń joǵary jalaqy alatyn saıasatkerdiń tabysy taǵy 1 mln dollarǵa ósedi
ASTANA. KAZINFORM — Sıngapýr úkimeti mınıstrler men basqa da laýazymdy tulǵalardyń, sonyń ishinde dúnıejúzindegi eń joǵary jalaqy alatyn saıasatker bolyp esepteletin premer-mınıstrdiń jyldyq jalaqysyn kóterýdi josparlap otyr, dep habarlaıdy Kazinform BBC-ge silteme jasap.
Jalaqy óskennen keıin dúnıejúzi boıynsha onsyz da eń joǵary sanalatyn Sıngapýr mınıstrleriniń tabysy 60%-dan astamǵa artady.
Sıngapýr premer-mınıstri Loýrens Vongtyń jyldyq jalaqysy 2,2 mln sıngapýr dollarynan (1,7 mln AQSh dollary) 3,6 mln sıngapýr dollaryna (2,8 mln AQSh dollary) deıin kóbeıedi. Premer-mınıstr bul qosymsha qarajatty aldaǵy bes jylda qaıyrymdylyqqa jumsaıtynyn aıtty.
Jalaqysy óskenge deıin de Loýrens Vong álemdegi eń joǵary jalaqy alatyn kóshbasshy bolyp otyr.
Al Sıngapýr mınıstrleriniń jyldyq jalaqysy eńbek ótili men atqaratyn qyzmetiniń mańyzyna qaraı 1,8 mln-nan 2,8 mln sıngapýr dollaryna deıin jetedi.
Úkimet bul bastamany talantty mamandardy memlekettik qyzmetke tartý qajet ekenimen túsindirdi. Buǵan deıin bılik mınıstrlerge joǵary jalaqy tóleý sybaılas jemqorlyqtyń aldyn alýǵa yqpal etetinin aıtqan.
Sonymen qatar Loýrens Vong Sıngapýr mınıstrleriniń jalaqysy el azamattarynyń basym bóliginiń tabysynan aıtarlyqtaı joǵary ekenin moıyndady. Sıngapýrdaǵy ortasha aılyq tabys — 5 775 sıngapýr dollar.
Sıngapýr mınıstrleriniń joǵary jalaqysy elde burynnan beri qyzý talqylanyp keledi. Bul másele bıliktegi Halyqtyq is-qımyl partııasynyń (PAP) da ótkir synyna sebep bolǵan.
2011 jylǵy mańyzdy jalpyulttyq saılaýda PAP birneshe onjyldyqtaǵy eń tómen daýys úlesin jınady. Buǵan mınıstrlerdiń jalaqysyna narazylyq pen kóshi-qon saıasaty da áser etken. Kelesi jyly úkimet mınıstrlerdiń jalaqysyn aıtarlyqtaı qysqartty.
Jalaqyny kóterý týraly habardan keıin jeli qoldanýshylarynyń kópshiligi bul sheshimdi synady. Olar ınflıatsııa, jumys oryndarynyń qysqarýy jáne túlekterdiń jumysqa ornalasýyna qatysty alańdaýshylyq kúsheıip turǵan kezde mundaı ósimdi «orynsyz» dep baǵalady.
Úkimet málimetinshe, Sıngapýrda bıylǵy ekinshi toqsanda jumystan bosatylǵandar sany keıingi bes jyldan astam ýaqyttaǵy eń joǵary deńgeıge jetken.
Eske salaıyq, buǵan deıin Sıngapýr 2006 jyldan beri 12-shi ret jahandyq qaýipsizdik reıtınginde I oryndy ıelengenin jazǵanbyz. 2024 jyly sıngapýrlyqtardyń 98 paıyzy túnde jalǵyz serýendegen kezde ózderin qaýipsiz sezinetinin aıtqan. Bul — Gellap ınstıtýty tirkegen álemdegi eń joǵary kórsetkishterdiń biri.
