Álemdegi eń jyldam marafonshy kólik apatynan qaza boldy
ASTANA. KAZINFORM – Erler arasynda marafon júgirýden rekord ornatqan 24 jastaǵy Kelvın Kıptým týǵan jerinde kólik apatynan qaza tapty, dep habarlaıdy VVS.
Ol óziniń jattyqtyrýshysy, rýandııalyq Jervez Hakızımanamen birge jeksenbi kúni Kenııa batysyndaǵy jolda kele jatyp qaza boldy.
Kıptým 2023 jyly otandasy, álemdegi uly marafonshylardyń biri Elıýd Kıpchogeniń qarsylasy boldy. Al byltyr qazanda Chıkagoda Kıpchoge jetistigin jańartyp, 42 shaqyrym qashyqtyqty eki saǵat, 35 sekýndta ótkerdi.
Eki sportshy bıylǵy jyldyń sońynda Parıjdegi Olımpıada oıyndarynda Kenııanyń marafon boıynsha qurama komandasynyń aldyn ala tizimine engizilgen.
Kenııa oppozıtsııasynyń kóshbasshysy ári burynǵy premer-mınıstr Raıla Odınganyń málimdeýinshe, el «naǵyz qaharmanynan» aıyrylyp, «ataqty tulǵa...jáne kenııalyq jeńil atletıka ıkonasynyń qazasyna baılanysty» qaıǵyryp otyr.
Dúnıejúzilik jeńil atletıka qaýymdastyǵynyń prezıdenti Sebastıan Koýdiń aıtýynsha, Kıptým «adam sengisiz mura qaldyrǵan naǵyz tulǵa» boldy.
AFP agenttiginiń Kenııa polıtsııasyna silteme jasap habarlaýynsha, apat jeksenbi kúni jergilikti ýaqytpen saǵat 23:00 shamasynda boldy.
Aqparatqa sáıkes, apat oryn alǵanda kólikti Kıptým júrgizip kele jatty.