Álemdegi eń úlken aısbergtiń aýdany shamamen myń sharshy shaqyrymǵa qysqardy

ASTANA. KAZINFORM — Álemdegi eń úlken aısberg A23a jazdyń úsh aıynda myń sharshy shaqyrymǵa jýyq aýmaqty joǵaltty, dep habarlaıdy Arktıka jáne Antarktıka zertteý ınstıtýty.

— Aısbergten árqaısysynyń kólemi 60 pen 300 sharshy shaqyrym aralyǵyndaǵy úsh muz bóligi bólinip shyqty. Maýsym aıynyń basynda A23a aýmaǵy 2730 sharshy shaqyrymdy qurady, bul Reseı astanasy Máskeýdiń kólemine teń. Qyrkúıektiń basynda aısbergtiń aýdany 1750 sharshy shaqyrymǵa baǵalandy (Sankt-Peterbýrg aýdanymen salystyrýǵa bolady), — dep habarlady Arktıka jáne Antarktıka zertteý ınstıtýty.

1 qyrkúıektegi jaǵdaı boıynsha, aısberg Atlant muhıtyndaǵy Ońtústik Djordjııa aralynan soltústikke qaraı 70 shaqyrym jerde qalqyp júr.

A23a aısbergi 1986 jyly Batys Antarktıdadaǵy Fılhner muz aıdynynyń syrtqy jıeginen bólinip shyqty. Ol kezde onyń aýdany 4170 sharshy shaqyrymǵa baǵalanǵan. Ol 30 jyldan astam ortalyq Ýeddell teńiziniń taıaz jerlerinde qalqyp júrdi, sodan keıin Antarktıda jaǵalaýymen qozǵala bastady jáne 2023 jyldyń qarasha aıynyń ortasynda muhıtqa kirdi. Aısberg qozǵalýdy jalǵastyrdy jáne 2025 jyldyń basynda ol Ońtústik Djordjııaǵa jaqyndady.

Eske sala keteıik, álemdegi eń úlken aısberg joıylyp ketýi múmkin.