Álemdegi eń úlken aısberg aldaǵy aptalarda tolyǵymen joıylýy múmkin

ASTANA. KAZINFORM — NASA ǵalymdary sońǵy onjyldyqta óz aýmaǵynyń jartysynan kóbin joǵaltqan Aısberg A23a aldaǵy kúnderde nemese aptalarda tolyǵymen joıylýy múmkin ekenin eskertti, dep habarlaıdy BELTA.  

Spýtnıktik baqylaýǵa sáıkes, muz massıviniń betinde erigen sýdyń úlken basseınderi paıda boldy, bul onyń qurylymdyq álsireýin kórsetedi.

— Bul belgiler A23a aısberginiń birneshe kún nemese apta ishinde tolyǵymen ydyraýy múmkin ekenin kórsetedi… Ony búkil mansabynda baqylaǵan ǵalymdar úshin bul ókinishti jáne mańyzdy sát, — dep atap ótti NASA.

Aısberg A23a 1986 jyly Fılchner muz aıdynynan bólingen, ol 4170 sharshy shaqyrymdy alyp jatyr. Ol sońǵy onjyldyqda birte-birte qysqaryp — 2025 jyldyń jeltoqsanyna qaraı óziniń bastapqy aýmaǵynyń 67%-yn joǵaltty. Osylaısha, kólemi boıynsha D15a aısbergine jol berdi. A23a qazir Ońtústik Atlantıkada, Ońtústik Amerıkanyń ońtústik-shyǵysynda júzip júr.

30 jyldan astam bir jerde turǵan aısberg 2023 jyldyń qarashasynda qaıtadan qozǵala bastady. 2024 jyldyń kókteminde ol Antarktıka túbegi boıymen jyljyp, Shotlandııa teńizine qaraı bet aldy. A23a aısberginiń joǵalýy álemde eń úlken muz massasyn zertteıtin zertteýshiler úshin mańyzdy oqıǵa bolady.

Byltyr qyrkúıek aıynda dál osy aısbergtiń aýdany shamamen myń sharshy shaqyrymǵa qysqarǵany týraly jazdyq.