Álemdegi eń iri júk tasymaldaıtyn dron synaqtan sátti ótti - sheteldegi qazaq baspasózi
Kazinform HAAsheteldegi qazaq tilinde taraıtyn aqparat kózderine aptalyq sholýyn usynady.
Ózbekstan men Qazaqstan keden jáne kólik salasynda tájirıbe almasýda – ÓzA
Ózbekstan men Qazaqstan elderi arasyndaǵy strategııalyq seriktestik taǵy bir mańyzdy qadammen tolyqty. Qazaqstan delegatsııasy Ózbekstan Respýblıkasynyń Keden komıtetine resmı saparmen kelip, baýyrlas eldiń keden jáne kólik júıesindegi zamanaýı jańashyldyqtarmen tanysty, dep habarlaıdy «ÓzA» aqparat agenttigi.
Sapar barysynda qonaqtarǵa Ózbekstan keden qyzmetiniń jańǵyrý joly, halyqaralyq standarttardy engizý men tsıfrlandyrý baǵytynda qolǵa alynǵan aýqymdy reformalar keńinen tanystyryldy.
Habarlamada aıtylýynsha, delegatsııa músheleri zamanaýı tehnologııalarǵa negizdelgen Qashyqtan elektrondyq deklaratsııalaý ortalyǵynyń, maqsatty baqylaý jáne táýekelderdi monıtorıngteý júıesiniń, sondaı-aq Call-ortalyqtyń jumysymen tanysty.
Árbir qurylymnyń tıimdiligi, tsıfrlyq sheshimderdiń múmkindikteri men basqarý tetikteri tolyqtaı kórsetildi.
Mundaı mazmundy kezdesýler eki el arasyndaǵy senim men ózara túsinistikti odan ári nyǵaıtyp, keden jáne kólik salasyndaǵy úılesimdi damýǵa jol ashady.
Sondaı-aq osy aptada «ÓzA»-da «Regıstan alańy álemdegi eń kórikti oryndardyń qataryna endi» degen taqyryptaǵy aqparat jarııalandy.
Atalǵan BAQ-tyń dereginshe, adamzat tarıhynda jer betinde kórikti oryndardyń san alýandyǵy men sulýlyǵy ár dáýirde óz baǵasyn alyp, órkenıet aınasyna aınalyp keledi.
Bul turǵyda Ózbekstannyń baı tarıhı-mádenı murasy, ǵasyrlar qoınaýynan jetken aıbyndy sáýlet eskertkishteri álem jurtshylyǵy men týrısterdi ózine tánti etip otyr.
Ashyqaspan astyndaǵy mýzeı ispetti jergilikti qalalardaǵy kóne jádigerler men eskertkishter ulttyq mura retinde el abyroıyn asqaqtatýda mańyzdy ról atqaryp keledi.
Jýyrda «TimeOut» jýrnaly 2026 jylǵa arnalǵan álemdegi eń ásem oryndar tizimin jarııalady. Atalǵan reıtıngke jer sharyndaǵy eń kórikti 51 meken engen. Solardyń qatarynda Samarqandtaǵy Regıstan alańy da laıyqty oryn aldy.
Túrki memleketteri uıymynyń Bas hatshysy Ázerbaıjanǵa keldi - Eurasia Today
Túrki memleketteri uıymy Bas hatshysy Kýbanychbek Ómiralıev Ázerbaıjanǵa issaparmen keldi, dep jazady Eurasia Today aqparat agentti.
Eýrazııa Týdeıdiń habarlaýynsha, 1 sáýir kúni Geıdar Alıev atyndaǵy halyqaralyq áýejaı ony Ázerbaıjan Syrtqy ister mınıstrliginiń Shyǵys Eýropa, Ońtústik Kavkaz, Batys jáne Ortalyq Azııa basqarmasynyń bastyǵy Gıýrsel Ismaılzade jáne basqa da resmı tulǵalar qarsy aldy.
2 sáýirde Baký qalasynda Túrki memleketteri uıymyna múshe elderdiń úkimet basshylary men vıtse-prezıdentteriniń ekinshi otyrysy ótedi, dep josparlanǵanyn jazady EurasiaToday.
Jıyn barysynda qatysýshylar ekonomıka, saýda, ınvestıtsııalar, kólik, tsıfrlandyrý, energetıka jáne aýyl sharýashylyǵy salalaryndaǵy ózara is-qımyl máselelerin talqylap, kópjaqty yntymaqtastyqty nyǵaıtýǵa baǵyttalǵan tetikterdi jetildirý joldaryn qarastyrady.
Aıta keteıik,atalǵan formattaǵy alǵashqy otyrys 2025 jyldyń qyrkúıeginde Bishkek qalasyndaótken.
Air Astana Almaty-Shanhaıbaǵytyn iske qosty – «Halyq gazeti»
30 naýryz kúni Air Astana áýe kompanııasynyń Almatydan Shanhaıǵa tikeleı reısi Shanhaı Pýdýn halyqaralyq áýejaıyna qondy.
Bul týraly osy aptada Qytaıdyń «Halyq gazeti» basylymy habarlady.
Qytaılyq BAQ-tyń málimetinshe, jańa baǵyt aptasyna úsh ret oryndalady: Almatydan Shanhaıǵa reıster seısenbi, beısenbi jáne jeksenbi kúnderi ushady. Al Shanhaıdan Almatyǵa reıster dúısenbi, sársenbi jáne juma kúnderi ushady.
- Qazirgi ýaqytta Air Astana Qazaqstan men Qytaıdy baılanystyratyn qos baǵyttaǵy jeti baǵytty basqarady, onyń ishinde Almatydan Beıjińge, Shanhaıǵa, Úrimjige jáne Gýanchjoýǵa qatynaıtyn baǵyttary, taǵy da Astana - Beıjiń baǵyty, Almaty men Astanadan Sanıaǵa charterlik reıster bar, dep jazady «Halyq gazeti».
Sonymen qatarosy aptada «Halyq gazeti» basylymynda «Jibek jolyndaǵy mýzyka men bı: órkenıet almasýynyń tarıhı jańǵyryǵy» degen aqparat jaryq kórdi.
Atalǵan basylymnyń málimetinshe, Qytaıdyń Henan murajaıynda saqtalǵan Soltústik Tsı áýletine jatatyn sary syrly qumyra Jibek joly dáýirindegi mádenı almasýdyń aıqyn dáleli bolyp otyr. Qumyra betinde Ortalyq Azııadan taraǵan «Hýten bıi» beınelengen. Zertteýshilerdiń málimetinshe, «Hýten bıi» qazirgi Ózbekstan aýmaǵynda paıda bolǵan. Bul – sekirip bıleıtin, er adamdar oryndaıtyn bı túri. Jibek joly arqyly ol Qytaıdyń Orta jazyǵyna jetip, saraı men halyq arasynda keń taralǵan.
Tarıhı derekterge sáıkes, Chjan Tsıan bastaǵan elshilik saparlardan keıin Qytaı men Ortalyq Azııa arasyndaǵy mádenı baılanystar nyǵaıyp, mýzyka men bı óneri ózara yqpaldasa bastady. Ásirese Sýı jáne Tan áýletteri kezeńinde sheteldik mýzykalyq dástúrler jergilikti mádenıetpen úılesip, ónerdiń damýyna serpin berdi. Bul kezeń Qytaı mýzykasy men bıiniń gúldený dáýiri retinde baǵalanady.
Qytaıda 7 tonnalyq tuńǵysh ushqyshsyz júk ushaǵy synaqtan ótti - CNR
2026 jylǵy 31 naýryzda Qytaıdyń Henan ólkesine qarasty Chjenchjoý qalasyndaǵy Shantsze áýejaıynda Chanın-8 iri turpatty júk tasymal ushqyshsyz ushaǵy alǵash ret sátti synaqtan ótti, dep habarlaıdy Qytaıdyń Ortalyq halyq radıosy aqparattyq portaly.
Bul apparat qazirgi ýaqytta álemde ushyrylǵan eń iri júk tasymaldaıtyn dron retinde tirkelip otyr. Synaq barysynda ushýdyń barlyq kezeńin ıntellektýaldy júıe basqaryp, zamanaýı avtomattandyrylǵan baqylaý tehnologııalary qoldanyldy. Ushý turaqty ótip, barlyq júıeler qalypty jumysistegen.
Atalǵan jetistik Qytaıdyń 7 tonnaǵa deıin júk kótere alatyn ıntellektýaldy ushqyshsyz tasymal platformalaryn damytýda mańyzdy kezeńge jetkenin kórsetedi. Ushaq uzaq qashyqtyqqa júk tasymaldaý, tótenshe jaǵdaıda kómek jetkizý jáne shalǵaı óńirlerdi qamtamasyz etý úshin qoldanylady. Onyń ushý qashyqtyǵy 3000 shaqyrymnan asady.
Sondaı-aq osy aptada CNR basylymynda «Robottardyń saýdaǵa bet burýy qarqyndy damyp keledi» degen taqyryptaǵy aqparat jarııalandy.
Atalǵan BAQ-tyń dereginshe, robottardyń ártúrli ortada keńinen qoldanylýyna baılanysty olardy jalǵa berý naryǵy kún saıyn jandanyp, bul salanyń kommertsııalaný úderisi jedeldeı tústi.
Jalǵa berý formaty kásip salasy men tutyný naryǵy arasyndaǵy tıimdi dánekerge aınaldy.
Ikemdi qyzmet kórsetý tásili arqyly robottar týrıstik aımaqtarda, saýda ortalyqtarynda, oıyn-saýyq oryndarynda, sondaı-aq kásiporyndar men mádenı-týrıstik jobalarda keńinen qoldanys tabýda.
Kóptegen nysandar robottardy qysqa merzimge jalǵa alý arqyly kelýshilerdi kóbirek tartyp, tabysyn arttyryp, shyǵyndaryn jyldam óteýge múmkindik alyp otyr.
Zertteý uıymdarynyń boljamynsha, 2026 jyly Qytaıdaǵy robottardy jalǵa berý naryǵy qarqyndy ósip, onyń kólemi 10 mıllıard ıýannan asady. Bul kórsetkish 2025 jylmen salystyrǵanda shamamen 10 ese joǵary.
Dıdro áseri: tutyný áleginiń psıhologııalyq sebebi – TRT
Bir ǵana jańa zat satyp alý adamnyń qosymsha taýarlar alýǵa degen nıetin arttyrýy múmkin.
Bul qubylys psıhologııada «Dıdro áseri» dep atalatynyn jazady Túrkııa Radıo Televızııa portaly.
Túrkııalyq BAQ-tyń keltirgen málimetterine súıensek, atalǵan uǵym Denı Dıdro esimimen baılanysty. Fılosof jańa halat alǵannan keıin ózge zattaryn da jańartýǵa umtylǵanyn jazǵan. Keıin bul jaǵdaı tutyný minez-qulqyn túsindiretin ǵylymı uǵymǵa aınaldy.
Mamandardyń aıtýynsha, jańa satyp alynǵan zat adamnyń aınalasyndaǵy basqa buıymdarmen úılesimsiz kórinip, qosymsha shyǵyndarǵa ákeledi. Sonyń saldarynan adamdar qajetsiz taýarlardy da satyp alýy múmkin. Bul áserdi marketıng salasynda keńinen paıdalanady.
Kompanııalar ónimderdi bir-birimen úılesimdi túrde usynyp, tutynýshyny birneshe zatty qatar alýǵa yntalandyrady. Sarapshylar artyq tutynýdan saqtaný úshin ár satyp alý aldynda «Bul maǵan shynymen qajet pe?» degen suraq qoıýdy usynady.
Túrkııalyq basylym osy aptada bul taqyrypqa keńinen toqtalǵan.
